ԼՂՀ հասարակական-քաղաքական գործիչների և քաղաքացիների նախաձեռնողական խումբը նախաձեռնել է Լեռնային Ղարաբաղում նոր աջակենտրոն քաղաքական կազմակերպություն՝ Արցախի Հանրապետական կուսակցություն հիմնելու գործընթացը:
Նախաձեռնող խմբի անդամների մոտ կուսակցություն ստեղծելու գաղափարը հասունացել է հատկապես Արցախում վերջին խորհրդարանական ընտրություններից հետո: Վերջին խորհրդարանական ընտրությունները, քաղաքական կազմակերպությունների նախընտրական ծրագրերը, ըստ նրանց՝ ցույց տվեցին, որ քաղաքական կազմակերպությունները չունեն կամք և հնարավորություն՝ ադեկվատ գնահատելու Արցախի Հանրապետության սոցիալ-տնտեսական և քաղաքական վիճակը և կոնկրետ մեխանիզմներ մշակելու երկիրը զարգացման նոր՝ բարձր մակարդակ դուրս բերելու ուղղությամբ:
Բացի այդ, խորհրդարան անցած քաղաքական կազմակերպություններից ոչ մեկը ի վիճակի չէ ժողովրդին համախմբել՝ լուծելու արդի պահանջներից բխող խնդիրները և երկիրը հանելու միջազգային հարաբերությունների հարթակ, որը հետագայում կբերի երկրի ճանաչման և մեր երկրի անվտանգության կայուն մակարդակի ստեղծման, ինչից էլ դրդված՝ մի քանի անձինք նախաձեռնել են Լեռնային Ղարաբաղում նոր աջակենտրոն քաղաքական կազմակերպություն՝ Արցախի Հանրապետական կուսակցություն ստեղծելու գործընթացը:
«Այսօր մեր հասարակությունը բախվում է շատ լուրջ սոցիալ-տնտեսական խնդիրների, որոնք առաջ են բերում հասարակության մեծամասնության դժգոհությունը: Եվ անկախ նրանից, որ այսօր մեր երկրում՝ Արցախում, շինարարությունը բավական հաջողություններ է գրանցում, այնուամենայնիվ՝ վերջին շրջանում ստագնացիա է նկատվում ինչպես սոցիալ-տնտեսական, այնպես էլ քաղաքական ու ԼՂ հակամարտության խաղաղ կարգավորման գործընթացում, որի չլուծված լինելը նվազագույնի է հասցնում երկրի, հասարակության անվտանգության երաշխիքները: Այս բոլոր բացասական երևույթները ի հատ են գալիս երկրում պետական և քաղաքական գաղափարախոսության բացակայության ֆոնին»,- «Առաջին լրատվական»-ի հետ զրույցում ասաց նախաձեռնող խմբի անդամ, ԼՂՀ «Հելսինկյան նախաձեռնություն-92» կոմիտեի համակարգող, «Սոցիալական արդարություն» կուսակցության նախագահ Կարեն Օհանջանյանը:
Վերջինիս խոսքով՝ Արցախի Հանրապետական կուսակցության և Հայաստանի Հանրապետական կուսակցության միջև որևէ կապ պետք չէ փնտրել: Նմանությունը միայն անվանման մեջ է: Նրա խոսքով՝ Արցախի Հանրապետական կուսակցությունը խարսխված է լինելու բացառապես ժողովրդավարական արժեքների վրա: «Միևնույն ժամանակ մեր կուսակցությունը կհամագործակցի Հայաստանի բոլոր այն կուսակցությունների հետ, որոնց գաղափարախոսությունը մոտ կլինի մեր կուսակցության գաղափարախոսությանը, այդ թվում՝ նաև ՀՀԿ-ի»,- նկատեց Օհանջանյանը:
Վերջինից հետաքրքրվեցինք՝ նոր կուսակցության ստեղծումը արդյոք պայմանավորվա՞ծ է 2017-ին Արցախում սպասվող նախագահական ընտրություններով: «Ցանկացած կուսակցություն ստեղծվում է ՏԻՄ, խորհրդարանական և նախագահական ընտրություններին մասնակցելու նպատակով: Մենք ենթադրում ենք, որ մեր կուսակցությունը մասնակցելու է բոլոր հասարակական-քաղաքական գործընթացներին, որոնք տեղի կունենան Լեռնային Ղարաբաղի Հանրապետությունում: Եվ 2017-ի նախագահական ընտրությունները բացառություն լինել չեն կարող»,- ասաց մեր զրուցակիցը:
Ինչ վերաբերում է կուսակցության ֆինանսավորմանը, ապա Օհանջանյանն ասաց, որ այս պահի դրությամբ դեռ պարզ չէ, թե որոնք են լինելու կուսակցության ֆինանսավորման աղբյուրները: «Միայն հստակ է, որ սկզբնական շրջանում մենք կօգտագործենք կուսակցության անդամների անդամավճարներից գոյացած գումարը: Կուսակցության կազմավորումից հետո կհամակարգվեն ֆինանսական մուտքերը՝ համապատասխան ԼՂՀ օրենքների։ Մեր որոշմամբ կուսակցության նախագահի հարցը որոշվելու է կուսակցության համանախագահության ինստիտուտի համաձայն»:
Արցախում գործող «Ազգային վերածնունդ» ընդդիմադիր կուսակցության ղեկավար Հայկ Խանումյանն «Առաջին լրատվական»-ի հետ զրույցում ասաց, որ շատ նորմալ է վերաբերվում քաղաքական նոր ուժի ստեղծմանը՝ հատկապես, եթե այդ գործընթացը նախաձեռնել են նախկինում պատգամավոր եղած անձինք: «Օրենքը թույլատրում է որոշակի պայմանների բավարարման դեպքում կուսակցություն ստեղծել: Եվ եթե քաղաքացիների խումբը որոշել է նման նախաձեռնությամբ հանդես գալ, դա ամբողջովին իրենց իրավունքն է»,-ասաց Խանումյանը:
Ընդդիմադիր պատգամավորի խոսքով՝ դժվար է ասել, որ այս նոր կուսակցության ստեղծումը որոշակիորեն կապված է 2017 թվականի նախագահական ընտրությունների հետ: «Չեմ կարծում, որ նախագահական ընտրությունների ժամանակ քաղաքական կուսակցությունների դերը, այն էլ՝ նորաստեղծ, մեծ է: Բայց համապատասխան ցենզ ունեցող անձինք միշտ էլ կարող են առաջադրվել, և չեմ կարծում, որ որևէ նորաստեղծ կուսակցության աջակցություն կարող է էական լինել նրանց համար»,- ասաց Խանումյանը՝ նկատելով, որ չի էլ կարծում, թե այդ նորաստեղծ ուժը կարող է խոչընդոտ կամ հակակշիռ լինել Արցախի առաջատար քաղաքական ուժերին:
«Նպատակներին խորությամբ ծանոթ չեմ, պարզապես նախաձեռնող խմբից բոլորին ճանաչում եմ, հասարակական սեկտորից են հիմնականում, նախկինում պատգամավոր են եղել, և շատ նորմալ է, որ նախկին պատգամավորները փորձում են քաղաքական ուժ ստեղծել: Հարցին պետք է նայել այս տրամաբանությամբ և ինչ որ բաներ չփնտրել դրա տակ»,- եզրափակեց մեր զրուցակիցը: