Թուրքական Cumhuriyet թերթի փոխանցմամբ, ԵԽԽՎ գարնանային նստաշրջանին մասնակցելու նպատակով Ֆրանսիայում գտնվող Թուրքիայի վարչապետ Ռեջեփ Թայիփ Էրդողանը դժգոհել է ԱՄՆ-ից.
«ԱՄՆ այցելել պատրաստվող իմ դուստրը անցագիր ստանալու համար դիմել էր Անկարայում գտնվող ԱՄՆ դեսպանատուն, սակայն մերժում էր ստացել: Նրան պատասխանել էին, որ լուսանկարը չի համապատասխանում իրենց պահանջներին, քանի որ դուստրս լուսանկարում պատկերված է եղել թյուրբանով (գլուխն ու պարանոցը ծածկող իսլամական գլխաշոր): Փաստորեն, ԱՄՆ այցելել պատրաստվող մեր քաղաքացիներին «հաճելի» ճանապարհորդություն է սպասվում»:
Նշվում է, որ խնդիրը հարթվել էր Էրդողանի անմիջական միջամտության արդյունքում: Ամերիկյան կողմն էլ Էրդողանին պատասխանել է, որ իրենց օրենքներով ԱՄՆ այցելողներին չի պարտադրվում հանել գլխաշորերը, սակայն լուսանկարի մեջ պետք է երևա մարդու դեմքն ամբողջությամբ:
Հիշեցնենք, որ 2002 թվականին Թուրքիայի ներկայիս նախագահ Աբդուլլահ Գյուլի կինը` Հայրյունիսա Գյուլը, Եվրադատարան էր դիմել այն բանից հետո, երբ նրան գլխաշոր կրելու պատճառով չէին ընդունել Անկարայի համալսարան։
Համաձայն իշխող շրջանակների` Թուրքիայում կանանց 2/3-ը գլխաշոր է կրում: Ի դեպ, 3 տարի առաջ Թուրքիայում անցկացված հարցախույզի արդյունքներից պարզվել էր, որ Թուրքիայում կանանց 71.5 տոկոսը գլխաշոր կրում է կրոնական մոտիվով (հիմնվելով սուրբ գրքի «Ան-նուր» սուրահի 31-րդ այաթի վրա), 7.6 տոկոսը՝ ելնելով կոլեկտիվիզմի մոտիվից, 3.9 տոկոսը թյուրբանը դիտարկում է որպես իր ինքնության անբաժան մաս, 3.4 տոկոսը` որպես բարոյականության ցուցիչ, 1.7 տոկոսը գլխաշոր է կրում հասուն տարիքի պատճառով և միայն 0,4 տոկոսն է թյուրբանը համարում իր քաղաքական հայացքների խորհրդանիշը: