Վրացական newsgeorgia.ru կայքի հաղորդմամբ, երեկ ԵԽԽՎ-ն 130 կողմ և 8 դեմ քվեների համամասնությամբ ընդունեց Վրաստանի մասին բանաձևը: Բանաձևի բովանդակությունը պատրաստել են Վրաստանի գծով ԵԽ-ի զեկուցողներ Կաստրոիտ Իսլամը և Մայքլ Յանսենը:
ԵԽԽՎ-ը ողջունում է ներքաղաքական հակամարտությունների հաղթահարման ուղղությամբ վրացական իշխանությունների քայլերը և այդ պլանում կարևորում 2010 թվականի մայիսի 30-ին կայացած տեղական ինքնակառավարման մարմինների ընտրությունները:
Վրաստանին կոչ է արվել շուտափույթ ընդունել նոր Ընտրական օրենսգիրք, ինչպես նաև մի շարք ուղղումներ մտցնել երկրի Սահմանադրության մեջ: Դա, մասնավորապես, վերաբերում է կառավարությանն անվստահություն հայտնելու գործընթացին, միջազգային համաձայնագրերի շուրջ բանակցությունների ժամանակ նախագահի կոնկրետ դերի ճշգրտմանը և պետբյուջեի ընդունման հարցում խորհրդարանի դերի ամրագրմանը:
Ինչ վերաբերում է զանգվածային լրատվամիջոցների խնդրին, ապա Վրաստանի գծով զեկուցողներն անհրաժեշտ են համարում դրանցում թափանցիկության ու բազմակարծության ավելացումը:
ԵԽԽՎ-ն Վրաստանին խորհուրդ է տալիս ապահովել տեղական ինքնակառավարման մարմինների անկախությունը և իշխանություններին առաջարկում է ուսումնասիրել բոլոր քաղաքապետարաններում, ծայրահեղ դեպքում՝ միայն խոշոր քաղաքներում քաղաքապետերի ուղղակի ընտրություն անցկացնելու հնարավորությունը:
Դատական մարմինների մասով խորհուրդ է տրվում վերացնել դատախազության ու արդարադատության նախարարության միասնությունը, քանի որ դա ակնհայտորեն խանգարում է դատական գործընթացների ժամանակ հրահանգներ արձակելուն: Վրացական իշխանությունները պետք է հետաքննեն կոռուպցիայի ու կաշառակերության բոլոր դեպքերը:
Վրաստանի ազգային փոքրամասնությունների խնդիրը նույնպես չի վրիպել զեկուցողների աչքից: Նրանց կարծիքով, իշխանությունները պետք է բարելավեն ազգային փոքրամասնությունների կրթական համակարգը, ինչն առաջին հերթին վերաբերում է նրանց մայրենի լեզվին և նոր միայն վրացերենին: Բացի այդ, ազգային փոքրամասնությունների ներկայացուցիչները պետք է առավել ակտիվորեն ներգրավված լինեն երկրի հասարակական կյանքի տարբեր ոլորտներում:
Եվ վերջում ԵԽԽՎ-ն Վրաստանին կոչ է անում անհապաղ վավերացնել տարածաշրջանային կամ ազգային փոքրամասնությունների լեզուների վերաբերյալ եվրոպական խարտիան և ընդունել կրոնի մասին օրենքը, որով բոլոր հավատքները կստանան իրավական կարգավիճակ ու պաշտպանված կլինեն:
Հիշեցնենք, որ ԱՄՆ պետդեպարտամենտի 2010 թվականի «Մարդու իրավունքների» զեկույցում նշված էր, որ, թեև 2003 թվականից հետո Վրաստանը որոշակի առաջընթաց է գրանցել կոռուպցիայի դեմ պայքարում, այնուամենայնիվ, այն դեռ շարունակում է խնդիր մնալ, քանի որ իշխանության ներկայացուցիչները շարունակում են անպատիժ մասնակցել բարձր մակարդակի կոռուպցիոն գործընթացներին: