Ռուսաստանի Դաշնության վարչապետ Վլադիմիր Պուտինը նախօրեին կոչ է արել խուսափել շտապողականությունից 2012 թ. նախագաական ընտրությունների վերաբերյալ դատողություններ անելիս: Լրագրողների հետ հանդիպման ժամանակ նա նշել է, որ մինչև ընտրությունները դեռ մեկ տարի կա։ «Իսկ այս խառնաշփոթը ընտրությունների շուրջը չի նպաստում աշխատանքի բնականոն կազմակերպմանը»,- ասել է նա: Այս մասին հաղորդում է RIA-Novosti գործակալությունը:
Միաժամանակ նա հայտարարել է, որ ո՛չ ինքը և ո՛չ էլ նախագահ Մեդվեդևը չեն բացառում, որ նրանցից յուրաքանչյուրը կարող է մասնակցել ընտրություններին. «Իմ կարծիքով, մենք (Մեդվեդևն ու Պուտինը.– 1in.am) սովորել ենք միանման պատասխանել այս հարցին»,- ասել է Պուտինը: «Իհարկե, ինչ-որ մի պահի այդ որոշումը կկայացվի: Սակայն մինչև ընտրությունները մոտ մեկ տարի կա»,- ասել է վարչապետը` ավելացնելով, որ իր և Մեդվեդևի մասնակցության որոշումը կայացվելու է՝ ելնելով ընթացիկ տնտեսական, սոցիալական և քաղաքական իրավիճակից:
«Առաջին լրատվականը» երեկ տեղեկացրել էր, որ Մեդվեդևն առաջին անգամ խոսել էր երկրի զարգացման ուղիների վերաբերյալ իր և վարչապետ Պուտինի դիրքորոշումների տարբերության մասին. «Ես վստահ եմ, որ մեր խնդիրը մեկն է` որպեսզի տասը-քսան տարի հետո Ռուսաստանը լինի աշխարհի ամենաուժեղ, հզոր պետություններից մեկը… Պարզապես մենք տարբեր կերպ ենք նայում այն մեթոդներին և միջոցներին, որոնցով պիտի հասնենք այդ բարգավաճմանը: Սակայն դա հենց ժողովրդավարությունն է, դա հենց մրցակցությունն է: Ահա, ես ունեմ մի դիրքորոշում, ինչ-որ մեկինը կարող է մի փոքր այլ լինել: Եվ միայն փոխհարստացումը կարող է արդյունք տալ»,- ասել էր նախագահը: «Իմ նպատակը տնտեսական և քաղաքական կյանքի արդիականացումն է: Մենք չպետք է հրաժարվենք այն ամեն լավից, ինչ արել ենք, ասենք, վերջին 20 և, հատկապես, վերջին 10 տարիների ընթացքում, սակայն մենք պետք է առաջ նայենք»,- ավելացրել էր նա:
Մեդվեդևը նաև չէր բացառել, որ կառաջադրվի 2012 թ. նախագահական ընտրությունների ժամանակ, ինչի մասին ամենամոտ ապագայում խոստացել է հայտարարել: «Ապագան ոչ ոք, իհարկե, չգիտի, սակայն կարող եմ ասել, որ ես, որպես նախագահ, որպես երկրի գործող ղեկավար, իհարկե, դրա մասին մտածում եմ, ես ուղղակի պարտավոր եմ դա անել»,- ասել էր Մեդվեդևը: «Որոշումը կընդունվի, ընդ որում՝ ամենամոտ ապագայում, քանի որ արդեն մնացել է մեկ տարուց էլ պակաս ժամանակ: Սակայն այդ որոշումը նախ և առաջ պետք է հասուն լինի, և երկրորդը` այն պետք է հիմնված լինի ներկա սոցիալական իրավիճակի, գոյություն ունեցող քաղաքական նախապատվությունների դասավորության և, որ ամենակարևորն է, մարդկանց վերաբերմունքի վրա»,- նշել էր նա:
