Վրացական Apsny.ge կայքի փոխանցմամբ, Վրաստանը գնալով վերածվում է ավտոմեքենաների արտահանման շուկայի կարևոր խաղացողի: Այս մասին այսօր հայտարարել է Վրաստանի վարչապետ Նիկա Գիլաուրին.
«Վրաստանից արտահանվող ապրանքների թվում ավտոմեքենաները զբաղեցնում են առաջին տեղը: Թեև Վրաստանում գոյություն չունի սեփական ավտոմեքենաների արտադրություն, այնուամենայնիվ, նա կարողանում է դրանք վերաարտահանել:
2009 թվականի դեկտեմբերին Թբիլիսիի մերձակայքում, Ռուսթավի քաղաքում, բացվեց Անդրկովկասի խոշորագույն ավտոշուկան: Ունեցած տվյալների համաձայն, ուկրաինական Приватбанк-ը 25 միլիոն դոլար է ներդրել ավտոշուկայի զարգացման գործում, իսկ նախագծի ընդհանուր արժեքը կազմում է 40 միլիոն դոլար:
Ռուսթավիի ավտոշուկան դա մի ժամանակակից կոմպլեքս է, որը նախատեսված է 5000 ավտոմեքենաների համար և սպասարկվում է մաքսային տերմինալի կողմից: Այն ընկած է կենտրոնական ավտոմայրուղու մերձակայքում, ինչը հեշտացնում է ավտոմեքենաների գնումը:
Այստեղից էլ ավտոմեքենաներն առաքվում են մերձակա երկրներ` Հայաստան, Ադրբեջան, ինչպես նաև ասիական երկրներ: Հայաստանի ու Ադրբեջանի քաղաքացիները մեծ հոսքերով ժամանում են Վրաստան` ավտոմեքենա գնելու համար: Այդ երկրների հետ Վրաստանի ունեցած սահմանին հաճախակի կարելի է տեսնել նոր հետչբեկների, սեդանների ու կաբրիոլետների:
Բացի այդ, Վրաստանում գործում է գնված ավտոմեքենայի ձեևակերպման շատ պարզ համակարգ: Սակայն հարևան երկրներից ժամանած ավտոգնորդներին հիմնականում Վրաստանում գրավում է ավտոմեքենաների գինը:
Օրինակ, Ադրբեջանից ժամանած ավտոգնորդները նշում են, որ Վրաստանում ավտոմեքենայի մաքսազերծման գործընթացը 5 անգամով ավելի կարճ է տևում, քան` Ադրբեջանում: Վրաստանում ավտոմեքենայի գրանցումն ու համարների ստացումը տևում է 15 րոպեից ոչ ավելի և արժենում է ընդամենը 40 ամերիկյան դոլար»:
