Թուրքիայի կառավարությունը ծրագրում է պետականացնել Պոլսի Թուզլա շրջանում գտնվող հայկական որբանոցը՝ այն ոչնչացումից փրկելու համար։ Այս մասին գրում է թուրքական Daily Sabah թերթը:
«Քամփ Արմեն» որբանոցը մինչև հայկական համայնքին վերադարձվելը պետք է պետականացվի, և այդպիսով դրա տերը չպիտի տուժի:
Sabah Daily-ի հետ զրույցում Շինությունների վարչության նախագահ Ադնան Էրտեմն ասել է, թե որբանոցի հարցում կառավարությունը միայն բարի նպատակներ ունի:
«Նրանք, ովքեր խոսում են հայկական համայնքի անունից, ուզում եմ իմանան՝ մենք բարի նպատակներ ունենք։ Կառավարության վրա հարձակումները՝ պնդմամբ, թե որբանոցը նրա կողմից ոչնչացվում է, ճիշտ չէ»:
Էրտեմը նաև հավելել է, որ որբանոցը մի քանի անգամ փոխել է իր տերերին, և ներկայիս տերը պետք է արժանի հատուցում ստանա. «Միակ լուծումը պետականացումն է։ Դրանից հետո մենք պետք է կարողանանք քննարկել այն համայնքին հանձնելու հարցը»։
Նշենք, որ հայազգի լրագրող Հրանտ Դինքն իր ապագա կնոջ` Ռաքելի հետ ծանոթացել է այդ որբանոցում պատսպարվելու տարիներին:
