Վրացական Medianews կայքի փոխանցմամբ, այսօր սկսվում է ԱՄՆ պետքարտուղար Հիլարի Քլինթոնի եվրասիական շրջագայությունը, որի շրջանակներում նախատեսված է հանդիպում ՆԱՏՕ-Վրաստան հանձնաժողովի ներկայացուցիչների հետ:
Նշվում է, որ այսօր Քլինթոնն այցելում է Բեռլին, ուր մնալու է մինչև ապրիլի 15-ը: Այնտեղ Քլինթոնը պատրաստվում է միանալ ՆԱՏՕ-ի անդամ և գործընկեր երկրների արտգործնախարարներին:
Հանդիպման ժամանակ քննարկվելու են լիբիական ու աֆղանական խնդիրները: Հանդիպմանը մասնակցելու են նաև ՆԱՏՕ-Վրաստան և ՆԱՏՕ-Ուկրաինա հանձնաժողովների, ինչպես նաև ՆԱՏՕ-Ռուսաստան խորհրդի անդամները:
Հիշեցնենք, որ ՆԱՏՕ-Վրաստան հանձնաժողովը ստեղծվել է 2008 թվականի սեպտեմբերին` որպես քաղաքական խորհրդատվության ու գործնական համագործակցության ֆորում, որը նպաստելու է ՆԱՏՕ-ին Վրաստանի անդամակցությանը: