Ադրբեջանական Salam News կայքի փոխանցմամբ, Ադրբեջանի Պետական վիճակագրական կոմիտեն հրապարակել է ադրբեջանա-ամերիկյան ապրանքաշրջանառության տվյալները:
Նշվում է, որ այս տարվա հունվար և փետրվար ամիսներին երկու երկրների միջև ապրանքաշրջանառությունը կազմել է 467.48 միլիոն դոլար: Ընդ որում` ադրբեջանական արտահանումը կազմելէ 349.57 միլիոն դոլար (ողջ արտահանման 10.3 տոկոսը), իսկ ներկրումը` 117.91 միլիոն դոլար (ողջ ներկրման 8.88 տոկոսը): Ադրբեջանի համար դրական տարբերությունը կազմել է 231.66 միլիոն դոլար:
2010 թվականի առաջին երկու ամիսների համեմատ` 74.5 տոկոսով աճել է ադրբեջանական արտահանումն ԱՄՆ, իսկ ներկրումը` 42.8 տոկոսով:
2010 թվականին երկու երկրների միջև ապրանքաշրջանառությունը կազմել է 1 միլիարդ 744 միլիոն դոլար: Ընդ որում` ադրբեջանական արտահանումը կազմել է 1 միլիարդ 538 միլիոն դոլար (ողջ արտահանման 7.21 տոկոսը), իսկ ներկրումը` 206 միլիոն (ողջ ներկրման 3.13 տոկոսը): Տարբերությունը կազմել է 1 միլիարդ 332 միլիոն դոլար:
Հիշեցնենք, որ Ադրբեջանը նավթ է արտահանում հիմնականում ԱՄՆ: Ադրբեջանական նավթը Ռուսաստանի տարածքը շրջանցող «Բաքու-Թբիլիսի-Ջեյհան» նավթամուղով հասնում է Միջերկրական ծով, որտեղից լցանավերով` ԱՄՆ: