«Թուրքական հոսք» գազատարի մեկնարկած կառուցումը նշանակում է, որ Եվրոպան հետայսու ստիպված կլինի հաշվի առնել Ռուսաստանի և Թուրքիայի էներգետիկ ռազմավարությունը: Այս մասին գրում է Forbes պարբերականը:
Պարբերականը նշում է, որ «Թուրքական հոսքը» կարող է նոր ժամանակաշրջանի սկիզբ դառնալ Ռուսաստանի և Թուրքիայի քաղաքական և տնտեսական հարաբերություններում:
«Այդ գործարքը կարող է հող նախապատրաստել Եվրասիական տնտեսական միության համար, որն էներգետիկայի ոլորտում ձեռնոց կնետի Եվրոպայի ծրագրերին»,- ասվում է հոդվածում:
2015-ին ԵՄ-ն կհայտարարի իր էներգետիկ անվտանգությունը խստացնելու և եվրոպական էներգետիկ միություն ստեղծելու մտադրության մասին:
Իսկ Ռուսաստանը կարող է իր էներգետիկ միությունը հիմնել ԵՏՄ և Էկոնոմիկայի ու էներգետիկայի միջազգային ասոցիացիայի շրջանակներում, որտեղ ներառված է Թուրքիան:
Թուրքիայի աշխարհագրական դիրքը դրան ռազմավարական կարևոր խաղացող է դարձնում Եվրոպայի և Եվրասիայի համար: Նախագծելով Եվրոպական տնտեսական միությունը` ԵՄ-ն պետք է հիշի այդ ռազմավարական դերի մասին: Ըստ Forbes-ի` երկար տարիներ արևմտյան քաղաքական գործիչները և ներդրողները պետք է մրցակցեն Անկարայի «լավ վերաբերմունքին» արժանանալու համար:
