Հայ ազգային կոնգրեսի համակարգող Լևոն Զուրաբյանը կտրականապես հերքեց «Ժառանգություն» կուսակցության փոխնախագահ Ռուբեն Հակոբյանի հայտարարությունները, թե Կոնգրեսն իշխանությունների հետ համաձայնություն է ձեռք բերել արտահերթ ընտրություններ անցկացնելու վերաբերյալ: «Ես կտրականապես հերքում եմ, ոչ մի նման բան գոյություն չունի: Ավելին՝ երկրում ծավալվում է անհաշտ պայքար բռնապետության և ժողովրդի ազատագրական շարժման միջև»,- հայտարարեց նա:
Զուրաբյանն անդրադարձավ նաև Կոնգրեսի հասցեին հնչող մեղադրանքներին, թե իրենք այլևս չեն պահանջում Սերժ Սարգսյանի հրաժարականը: «Քանի անգամ և ինչքան հստակ մենք պետք է ձևակերպենք մեր այդ պահանջը, որ նման բան ասողները հասկանան, որ իրենք բռնաբարում են ճշմարտությունը:
Մեր առաջնային պահանջը Հայաստանում օր առաջ լեգիտիմ իշխանություն ձևավորելն է, իսկ դրա ամենաճիշտ ուղին նախ արտահերթ նախագահական ընտրությունների անցկացումն է, որին պետք է հետևի արտահերթ, գուցե նաև հերթական խորհրդարանական ընտրությունների անցկացումը»,- նշեց Զուրաբյանը: Պարոն Զուրաբյանը նաև նշեց, թե պետք է Կոնգրեսի պահանջները որակել որպես վերջնագիր: «Հավատացե´ք, երբ Տեր-Պետրոսյանը վերջնագիր դնի, կդնի շատ պարզ, քաղաքական լեզվով»,- նշեց նա:
