Ադրբեջանական Salam News կայքը հաղորդում է, որ Ադրբեջանը մտադիր չէ զիջումների գնալ սահմանային Դավիթ Գարեջի վանական համալիրի պատկանելության հարցում: Այս մասին հայտարարել է Ադրբեջանի արտգործնախարարության մամլո ծառայության պետ Էլխան Պոլուխովը:
Նա հիշեցրել է, որ վանական համալիրի մի մասը գտնվում է ադրբեջանական կողմում, իսկ մյուս մասը` վրացական: Պետական սահմանների գծումն իրականացվում է քարտեզների և այլ փաստաթղթերի ուսումնասիրությունից հետո: Հենց դրանց հիման վրա էլ կողմերը որոշում են սահմանի ճշգրիտ գիծը:
Ադրբեջանը մտադիր չէ զիջումների գնալ այս հարցում: Այն իր լուծումը կստանա ներկայումս ընթացող ադրբեջանա-վրացական ընդհանուր սահմանագծման գործընթացի շրջանակներում:
Հիշեցնենք, որ քարանձավային վանքերից բաղկացած այդ վանական համալիրի հնագույն վանքը կառուցվել է 6-րդ դարում սիրիացի միաբան Դավիթի կողմից, որը Գարեջա քարանձավում բնակություն հաստատած սիրիացի 13 միաբաններից մեկն էր:
Ի դեպ, Ադրբեջանում մի շարք քաղաքական գործիչներ առաջարկում են վանական համալիրն ամբողջությամբ հանձնել Վրաստանին, սակայն ադրբեջանական իշխանությունները չեն համաձայնում դրան:
