Երեկ Հայաստանում մեկնարկել է բռնցքամարտի Գագիկ Ծառուկյանի գավաթի խաղարկությունը: Ծառուկյանը Հայաստանի ազգային օլիմպիական կոմիտեի նախագահն է, և հենց նրա անվան գավաթն էլ խաղարկվելու է մրցաշարում: Բռնցքամարտի մրցաշարը թերևս խորհրդանշում է, որ Ծառուկյանը, լինելով նաև Հայաստանում երկրորդ իշխող կուսակցության նախագահը, փաստացիորեն դուրս է մնացել քաղաքական պրոցեսներից և այժմ աչքի է ընկնում միայն մարզական միջոցառումներով:
Այսինքն` Ծառուկյանը փաստացի դուրս է մնացել այն շախմատային պարտիայից, որ խաղարկվում է այժմ Հայաստանում: Սակայն շախմատում ասելիք չունենալով կամ անելիք չունենալով` Ծառուկյանը երևի թե որոշել է քաղաքականության մեջ մնալ բռնցքամարտով: Դա էլ, իհարկե, կարելի է տարբերակ համարել, միայն թե հարցն այն է, թե այդ տարբերակով Ծառուկյանը որպես ի՞նչ կմնա քաղաքականության մեջ: Մինչդեռ, քաղաքական գործունեություն ծավալելիս աչքի ընկնել միայն մարզական միջոցառումների կազմակերպմամբ և միայն այդ գործում ակտիվ լինել` նշանակում է քաղաքականության մեջ մնալ որպես սնանկացած ուժ: Եվ բռնցքամարտի մրցաշարի ճոխ բացումը իրականում ցույց է տալիս Գագիկ Ծառուկյանի` որպես քաղաքական ուժի սնանկությունը:
Մինչդեռ ընդամենը մեկուկես ամիս առաջ ներքաղաքական իրադարձությունները շրջանառվում էին հենց նրա շուրջ և նա, ըստ էության, Հայաստանի կյանքում քաղաքական լուրջ դերակատարություն իրականացնելու գրեթե պատմական պահ ուներ: Ծառուկյանն այդ պահը չօգտագործեց, և այդ ֆոնին արդեն բավական անլուրջ է թվում բռնցքամարտի շքերթը, որ նա կազմակերպում է: Քաղաքական նոկդաունից հետո, որին նա ենթարկվեց Սերժ Սարգսյանի հարվածից, Գագիկ Ծառուկյանի գավաթի խաղարկությունը ոչ այլ ինչ է, եթե ոչ նրա փառասիրության թույլ մխիթարություն: Բայց դրանով նա է՛լ ավելի ակնառու է ի ցույց դնում իր քաղաքական նոկդաունը:
Ծառուկյանը թերևս պետք է խորհի այդ մասին: Բռնցքամարտը դեռ նոր է սկսվել, բայց շախմատի մեկնարկից էլ կարծես թե շատ չի անցել, և գուցե թե դեռ ուշ չէ վերապրոֆիլավորվելը: Բռնցքամարտի ժամանակները Հայաստանում վաղուց են անցել` թե՛ բուն, թե՛ պատկերավոր իմաստով: Հիմա բռնցքամարտիկներին նույնիսկ ազատազրկում են, իսկ ազատարձակման միջնորդություններն էլ` մերժում: Ով ով` բայց Գագիկ Ծառուկյանը գոնե շատ լավ պետք է գիտենա դա, քանի որ ինքն էր Սերժ Սարգսյանին միջնորդել, որ ազատ արձակեն Սամսոն Խաչատրյանին, ինչից հետո, սակայն, դատարանը որոշում կայացրեց ուժի մեջ թողնել Խաչատրյանի երկամսյա կալանքի մասին որոշումը: Այսինքն` պարզ է, թե բռնցքամարտի և բռցքամարտիկների հանդեպ Սերժ Սարգսյանի ինչպիսի վերաբերմունքն է այժմ ուժի մեջ: