«Ամերիկայի քաղաքականությունը երկկուսակցական է եւ երբեք արմատապես չի փոխվում` անկախ նրանից՝ իշխանության մոտ դեմոկրատնե՞րն են, թե՞ հանրապետականները: Ամերիկայի ղեկավարության հայամետ դիրքորոշումը 1988-ից է եւ պահպանվում է մինչ օրս` ինչպես դեմոկրատների, այնպես էլ հանրապետականների մոտ», – հայտարարել է ադրբեջանցի քաղաքագետ Զարդուշտ Ալիզադեն` ադրբեջանական Zerkalo պարբերականին:
Խոսելով Ադրբեջանում ԱՄՆ-ի դեսպանի նշանակման, մասնավորապես Մեթյու Բրայզայի թեկնածության մասին` քաղաքագետը նշել է, որ դեսպանի նշանակման ձգձգումը կապված է ինչպես ԱՄՆ ներքին, այնպես էլ «Օբամայի վարչակազմի արտաքին քաղաքականության հետ, որն, իհարկե, ինչ-որ բանից դժգոհ է»: «Նրանք ինչ-որ բան են ուզում ստանալ Ադրբեջանից, եւ դա կապված է ոչ թե ժողովրդավարության և մարդու իրավունքների հետ, այլ ԱՄՆ-ի պետական շահերի: Նրանք դա չեն ստանում և դժգոհություն են արտահայտում` չնշանակելով դեսպանին», – նշել է Ալիզադեն: