Հուշարձանագետ Սամվել Կարապետյանը այսօր հրավիրված ասուլիսի ընթացքում նշեց, որ այն, ինչ ներկայացված է հրապարակումներում, պարզապես մի փշուր է, որովհետև շատ-շատ հուշարձաններից լուսանկարներ չունենք, ոչ էլ «Գուգլ»-ով ենք կարողանում գտնել, որովհետև որակապես լավ չեն ստացվում: «Բայց դրանք աստիճանաբար արժանանալու են համարի մեջ ներկայացված լուսանկարների ճակատագրին:
Խորհրդային տարիներին այն, ինչ հնարավոր էր անել, արվեց, բայց դա այն արդյունքը չունեցավ, որ մենք հիմա բավարար և ամբողջական թվեր ունենանք»,- նշեց Սամվել Կարապետյանը:
Խոսելով հայկական հուշարձանների թվից՝ նա նշեց, որ Կուրի ձախափնյա շրջաններում հաշվառվել է գրեթե 3000 հուշարձան, Հյուսիսային Արցախում՝ մոտ 6 հազար: Իսկ Արցախի Հանրապետությունում հուշարձանների հաշվառման աշխատանքը հենց հիմա ընթացքի մեջ է:
«Ելնելով այն հանգամանքից, որ միայն Հյուսիսային Արցախում մոտ 6 հազարի չափ հուշարձան կար, ուրեմն ԼՂՀ-ն, որը երկու անգամ ավելի տարածք ունի, ենթադրում եմ, որ կրկնապատիկ թվով էլ հուշարձաններ կունենա»,- ավելացրեց Սամվել Կարապետյանը:
