Երևանի ավագանու խորհրդի մարտի 15-ին ընդունված որոշմամբ, ապրիլի 1-ից քաղաքապետարանի ենթակայության տակ գտնվող բոլոր մանկապարտեզները անվճար են: Հիշեցնենք, որ մինչ այդ Երևանի տարբեր վարչական շրջաններում մանկապարտեզի վարձը կազմում էր մինչև 8000 դրամ: Ըստ նոր որոշման՝ մանկապարտեզ անվճար հաճախելու են Երևանում հաշվառված, ազատամարտիկ կամ զինծառայող ծնողների երեխաները: Մյուս բոլոր դեպքերում ծնողները պետք է վճարեն 8000 դրամ: Ի դեպ, նախապես վճարը սահմանված էր 18000 դրամ:
«Լավ է՝ հիմա որոշել են 8000 դրամ դարձնել վճարը: 10000-ը մեծ փող է մեզ համար: Ես մտադիր եմ փոխել գրանցումս, որպեսզի երեխաները անվճար հաճախեն մանկապարտեզ»,- մեզ հետ զրույցում ասում է Գորիս քաղաքում հաշվառված Նանա Կարապետյանը, որը բնակվում է Երևանում:
Ինչպես տեղեկացնում է Երևանի Կենտրոն համայնքի N5 մանկապարտեզի տնօրեն Աննա Ղազարյանը, անվճար հիմունքով մանկապարտեզ հաճախելու համար անհրաժեշտ է, որպեսզի ծնողները թաղապետարան ներկայացնեն իրենց անձնագրերն ու անձնագրի պատճեները, երեխայի ծննդյան վկայականը: Այդ դեպքում ստանալով համապատասխան վարչական շրջանում երեխայի գրանցված լինելու մասին փաստաթուղթ` ներկայացնեն այն մանկապարտեզ:
Հաշվառման գործընթացը արդեն սկսվել է, և բոլոր երեխաների փաստաթղթերի ներկայացման վերջնաժամկետը ապրիլի 30-նն է: «Նախկինում մենք վճարում էինք 11000 դրամ, որից 2000 դրամը՝ անգլերեն և ռուսերեն պարապմունքների համար, 1000-ը`ֆոնդի փող: Այժմ վճարելու ենք միայն այդ 3000-ը»,- մեզ հետ զրույցում տեղեկացնում է մանկապարտեզի սաներից մեկի մայրը:
Ըստ մանկապարտեզի տնօրեն Ղազարյանի` դեռ վաղ է ասել` փոփոխությունը դրականորե՞ն, թե՞ բացասաբար կանդրադառնա մանկապարտեզի գործունեության վրա: Միակ փոփոխությունը, որ նկատվում է, այն է, որ ավելացել են մեր մանկապարտեզ հաճախելու դիմումները: Սակայն տեղ չունենալու պատճառով բոլորին չենք ընդունում, այլ հերթագրում ենք»,- ասում է Ղազարյանը:
Ապրիլի 1-ից խստացվել է նաև մանկապարտեզներում բացակայությունների և ուշացումների վերահսկողությունը, դրանք գրանցելու համար հատկացվել է առանձին դասամատյան:
