Գեներալ Մանվել Գրիգորյանի հրահանգով օրերս փակվել է Էջմիածին քաղաքում գտնվող «Դուբայ» առևտրի կենտրոնը, որը համարվում էր քաղաքի ամենամատչելի առևտրի կետերից մեկը, որտեղ վաճառվում է հագուստ, կոշկեղեն, կենցաղային իրեր և այլ ապրանքներ:
Բանն այն է, որ այդ մատչելի առևտրի կենտրոնի պատճառով վատացել էր գեներալ Մանվելին պատկանող Էջմիածնի «Ունիվերմակ»-ի գործերը, ինչպես նաև «Լեժանկա» կոչվող առևտրի կետերի գործունեությունը, որի հասույթի առյուծի բաժինը ևս գեներալին է բաժին հասնում: Այդ տարածքում մարդիկ «լեժանկաների» վրա հագուստ և այլ իրեր են վաճառում, իսկ տարածքը պատկանում է գեներալին:
Այս օրերին Մանվել Գրիգորյանը իր թիկնապահներին ուղարկել է «Դուբայ» և քաղաքի այլ խանութներ, որտեղ խանութների զգուշացվել է, որ այլևս չպետք է աշխատեն: Իսկ բացատրությունը մեկն է եղել՝ գեներալն է էդպես ուզում: Իսկ քանի որ Էջմիածնում գեներալ Մանվելի որոշումները չեն քննարկվում, խանութների տերերին այլ ելք չի մնում, քան փակելը: Առայժմ փակվել է միայն «Դուբայ» առևտրի կենտրոնը, սակայն էջմիածինցիները վստահ են, որ նույն ճակատագիրը սպառնում է նաև մյուս խանութներին:
Նշենք, սակայն, որ «Դուբայ» առևտրի կենտրոնում բազմաթիվ տաղավարներ կային, տասնյակ առևտրականներ իրենց օրվա ապրուստը վաստակում էին հենց այդ աշխատանքի շնորհիվ: «Առանց այդ էլ էս ճգնաժամի պատճառով առանձնապես առևտուր չէինք անում, օրվա մեջ մի քանի կտոր բան ծախեինք` էլի լավ էր, հիմա էլ բռնեցին ու փակեցին: Բա սա անելու բանա: Մի մարդու քմահաճույքի ու սեփական բիզնեսի զարգացման պատճառով»,-«Առաջին լրատվական»-ի հետ զրույցում դժհոգեց վաճառականներից մեկը:
Ուշագրավ է, որ այս ֆոնին «Ունիվերմակ»-ում գեներալ Մանվելի որդիներից մեկն արդեն իսկ այս օրերին լոմբարդ է բացել: Այսինքն` ծաղկեցնում են «Ունիվերմակի» գործունեությունը, սակայն այդտեղ մարդկանց հոսքը սկսել է դադարել, քանի որ այդտեղ գները համեմատաբար թանկ են, իսկ քաղաքում այլ՝ առավել մատչելի խանութներ կան, այդ թվում «Հագուստի աշխարհը», որի խաթրին գեներալը չի ցանկանում կպնել, քանի որ այն, ըստ խոսակցությունների, պատկանում է գործարար Սամվել Ալեքսանյանին:
Ի դեպ, պատահական չէ, որ ամիսներ առաջ, երբ առևտրականները դժգոհում էին «Շրջանառության հարկի մասին» օրենքից և ակցիաներ էին անում այդ օրերին, Էջմիածնի «ունիվերմակի» և «լեժանկաներ» կոչվող տարածքի և ոչ մի առևտրական փողոց դուրս չեկավ և չպայքարեց օրենքի փոփոխության համար:
