Ռուսաստանում 2012 թ. նախագահական ընտրություններին ընդառաջ կարծես շատ արագ տեղի է ունենում քաղաքական գործընթացների բյուրեղացում:
Չինական հեռուստատեսությանը Դմիտրի Մեդվեդևի երեկվա հարցազրույցից հետո, երբ նա հայտարարել էր, որ չնայած Պուտինի հետ ունեն նույն նպատակը` բարգավաճող Ռուսաստան, սակայն տարբեր ճանապարհներ են տեսնում դրան հասնելու համար, նախագահի հայտարարություններին անմիջապես արձագանքել է իշխող «Եդինայա Ռոսիա» կուսակցությունը: Կուսակցության բարձրագույն խորհրդի անդամ Օլեգ Մորոզովը Interfax գործակալությանը տված հարցազրույցում նշել է, որ «Եդինայա Ռոսիան» կպաշտպանի Մեդվեդևի թեկնածությունը միայն այն դեպքում, եթե քվեաթերթիկներում չլինի վարչապետ Վլադիմիր Պուտինի անունը:
Այս դիրքորոշումը, ըստ Մորոզովի, պայմանավորված է նրանով, որ «Եդինայա Ռոսիա» կուսակցության առաջնորդը հենց Վլադիմիր Պուտինն է: Միաժամանակ կուսակցությունում կարծում են, որ գործող վարչապետն ու նախագահը համաձայնության կգան այն հարցի շուրջ, թե ով է առաջադրվելու 2012 թ. նախագահական ընտրությունների ժամանակ:
Ինքը` վարչապետ Վլադիմիր Պուտինը, այս հայտարարությունները չի մեկնաբանում: Ապրիլի 12-ին Կիևում գտնվող վարչապետը հրաժարվել է հանդիպել լրագրողների հետ, իսկ նրա խոսնակը նշել է, թե իրենք դեռ չեն ծանոթացել նախագահ Մեդվեդևի հարցազրույցին: