Վերահսկիչ պալատը ուսումնասիրություններ է կատարել 16 ոչ պետական բուհերում`Երեւանի կառավարման եւ ինֆորմացիոն տոխնոլոգիաների, «Օրբելի», «Գալիք», «Ուրարտու», «Ինտերլինգվա», «Անանիա Շիրակացի», Արտաշատի «Արտաշատ» համալսարաններում, Կովկաս ինստիտուտում, Երեւանի էկոլոգիայի եւ տնտեսագիտության իրավունքի հայկական ինստիտուտում, Եվրոպական կրթական տարածաշրջանային ակադեմիայում, Գեղեցիկ արվեստների ազգային ինստիտուտում, Ռոսլին արվեստի ինստիտուտում: Արձանագրված խախտումները ներկայացվել են ԿԳՆ, եւ նախարար Արմեն Աշոտյանն արդեն իսկ տեղեկացրել է ՎՊ նախագահին, որ համապատասխան գործողություններ են իրականացվում դրանք շտկելու համար: Մասնավորապես, ամբողջությամբ կասեցվել է Արտաշատի «Արտաշատ» համալսարանին բարձրագույն մասնագիտական կրթական ծրագրով տրվող գործունեության լիցենզիան: Որոշ բուհերում էլ մասնակի կասեցվել են մի շարք մասնագիտություններով տրվող լիցենզիաները:
ՎՊ նախագահը տեղեկացրեց, որ եւս 7բուհերում այժմ ընթանում են նմանատիպ ստուգումներ, որոնք իրականացնում է ԿԳՆ-ն:
Հիշեցնենք, որ երեկ կառավարության նիստի ժամանակ ԿԳ նախարար Արմեն Աշոտյանը նկատողություն է ստացել Տիգրան Սարգսյանի կողմից: «Հանձնարարվում է պարոն Աշոտյանին 10 օրվա ընթացքում ներկայացնել պարզ եւ հասկանալի գործողությունների ծրագիր, որպեսզի մենք այլևս չհանդուրժենք կոռուպցիոն երևույթները կրթական համակարգում, ընդհուպ մինչեւ կադրային փոփոխություններ։ Պետք է թարմացվեն խորհուրդների կազմերը բուհերում, եւ այն անձանց, որ մենք ենք ներկայացնում, հստակ հանձնարարականներ պետք է տրվեն, եւ այդ ուղղությունը պետք է լինի ամենակարեւորը` բացահայտել թերությունները եւ այդ թերությունների դեմ պայքարել»:
Թերեւս ՎՊ արձանագրած խախտումները նոր նկատողությունների առիթ կհանդիսանան եւ ավելորդ գլխացավանք Արմեն Աշոտյանի համար: