Հինգշաբթի երեկոյան Բաքու Է ժամանել ԱՊՀ-ի գործադիր կոմիտեի քարտուղար եւ ԱՊՀ-ի դիտորդական առաքելության ղեկավար Սերգեյ Լեբեդեւը, տեղեկացնում են ադրբեջանական գործակալությունները:
Լեբեդեւի այցը կշարունակվի մինչեւ նոյեմբերի 9-ը: Առաքելության կազմում հավատարմագրված Է մոտ 400 դիտորդ, որոնք ներկայացնում են ԱՊՀ-ի մասնակից պետությունները: Ադրբեջանի Միլի մեջլիսի ընտրությունների արդյունքների վերաբերյալ իր ամբողջական հայտարարությունը ԱՊՀ-ի դիտորդական առաքելությունը կներկայացնի նոյեմբերի 8-ին: ԱՊՀ-ի գործադիր կոմիտեի քարտուղարը ընտրություններից հետո` նոյեմբերի 9-ին, Բաքվում կմասնակցի «ԱՊՀ-ի եւ ՀՇԿ-ի լեզուների եւ մշակույթների երկխոսությունը» վեցերորդ միջազգային համաժողովին:
Միջոցառումը նվիրված Է ԱՊՀ-ի 20-ամյակին եւ կանցկացվի լիագումար ու սեսիոն նիստերի ձեւով: Լիագումար նիստում ելույթ կունենա ԱՊՀ-ի գործադիր կոմիտեի նախագահ-գործադիր քարտուղար Սերգեյ Լեբեդեւը: Նիստերի ընթացքում համաժողովի մասնակիցները կքննարկեն ԱՊՀ-ի եւ Համագործակցության Շանհայի կազմակերպության երկրների միջեւ հումանիտար համագործակցության քաղաքական, իրավական, տնտեսական, սոցիալական եւ մշակութային ասպեկտները, լեզուների եւ մշակույթների երկխոսությունը հումանիտար տարածության բազմալեզվության պայմաններում, ռուսաց լեզուն` որպես միջազգային ու ժողովուրդների ազգամիջյան հաղորդակցության միջոց, գեղարվեստական թարգմանությունը` որպես մշակույթների ու լեզուների փոխազդեցության ու փոխգործակցության միջոց, հոգեւոր կրթությունը` որպես ԱՊՀ-ի եւ ՀՇԿ-ի մասնակից պետությունների աշխարհիկ ու կրոնական ուսումնական հաստատությունների երկխոսություն:
Բացի այդ, համաժողովի շրջանակներում տեղի կունենա Համագործակցության երկրների լեզուների եւ մշակույթի վերաբերյալ ուսումնական նյութերի ցուցահանդես, կլոր սեղան՝ նվիրված «Միջմշակութային երկխոսությունը ԱՊՀ-ի եւ ՀՇԿ-ի տեղեկատվական տարածքում» թեմային: Համաժողովին կմասնակցեն ԱՊՀ-ի երկրների հայտնի քաղաքական գործիչներ, պետական ու գործադիր իշխանության, նախարարությունների ու գերատեսչությունների, ակադեմիական գիտության ներկայացուցիչներ, խորհրդարանների պատգամավորներ, բուհերի ռեկտորներ, առաջատար գիտնականներ:
