Այսօր գերմանական Die Welt օրաթերթին հարցազրույց է տվել ռուսաստանցի հայտնի գործարար, այժմ բանտում գտնվող Միխայիլ Խոդորկովսկին:
Հարցազրույցում հայտնի գործարարը հայտարարել է, որ տարբերություն չի տեսնում ԽՄԿԿ Կենտրոնական կոմիտեի քարտուղար Իոսիֆ Ստալինի և Ռուսաստանի վարչապետ Վլադիմիր Պուտինի միջև, համենայնդեպս այն հարցում, ինչ վերաբերում է արդարադատությանը:
«Ես կարդացել եմ ստալինյան բանաձևերը. «դատի տալ և գնդակահարել»: Ես լսել եմ Պուտինին. «պետք է նստի բանտում»` նշելով, որ մասնավորապես ինչ պետք է լինի երկրորդ դատավճռում (Խոդորկովսկին նկատի ունի իր դատավճիռը.– 1in.am)… Դատարանի անկախության ըմբռնումները թե՛ իրավաբան Պուտինի և թե՛ բանդիտ Ստալինի մոտ նույնն են»,- ասել է Խոդորկովսկին:
Ըստ Խոդորկովսկու` Մեդվեդևը ժողովրդավարական համոզմունքներ ունեցող մարդ է, որը բարեփոխումներ է ցանկանում. «Ցավոք, ցանկանալը քիչ է: Սեփական ցանկությունները կյանքի կոչելու գործնական հնարավորությունների հետ խնդիրներ կան: Արդյունքը` ակնհայտ անհետևողականությունն է»,- նշել է Խոդորկովսկին:
«Պուտինիզմին» այլընտրանք Ռուսաստանում կա, կարծում է Խոդորկովսկին. «Եթե «պուտինիզմ» ասելով` նկատի ունենք ավտորիտարիզմ, տնտեսության հումքային ուղղվածությունը և անորակ կառավարումը (երկրի արխայիկ կառավարումը), որը սնվում է ածխաջրածինների բարձր գներով, ապա այլընտրանք, անկասկած, գոյություն ունի: Ռուսաստանը եվրոպական մշակույթ ունեցող երկիր է, և ոչ մի նորմալ մոդելներ մեզ խորթ չեն: Պատմականորեն մեր երկիրը միշտ քայլել է համաեվրոպական ուղիով: Այս էտապը` «ռեակցիայի ցնծության» էտապ է, որը բնորոշ է բոլոր հեղափոխություններին»:
