Նախագահ Սերժ Սարգսյանին այսօր իր հավատարմագրերն է հանձնել Հայաստանում Ֆրանսիայի նորանշանակ դեսպան Անրի Ռենոն:
Նախագահականի փոխանցմամբ, Սերժ Սարգսյանը նշել է, որ Հայաստանի եւ Ֆրանսիայի միջեւ ձեւավորված հարաբերությունների բարձր մակարդակը մեծ պատասխանատվություն եւ այդ հարաբերություններն առավել ամրապնդելու պարտավորություններ է դնում երկու երկրների դեսպանների առջեւ: Դեսպան Ռենոն վստահեցրել է, որ ջանք չի խնայի` իր պաշտոնավարման շրջանում իրականացնելու երկու բարեկամ երկրների միջեւ հարաբերությունների ամրապնդմանն ուղղված բարձր առաքելությունը: Զրուցակիցները կարեւորել են հայ – ֆրանսիական տնտեսական, ինչպես նաեւ ապակենտրոնացված մակարդակով համագործակցության խորացումը, միջխորհրդարանական կապերի ամրապնդումը, Ֆրանկոֆոնիայի միջազգային կազմակերպության շրջանակներում գործակցությունը:
Նկատի առնելով Ֆրանսիայի ծանրակշիռ տեղն ու դերը Եվրամիության կառույցներում` Հայաստանի նախագահը եւ Ֆրանսիայի դեսպանն ընդգծել են ԵՄ-ի շրջանակներում երկու երկրների համագործակցության կարեւորությունը եւս:
