LifeNews-ին տված բացառիկ հարցազրույցում լեգենդար շանսոնյե Շառլ Ազնավուրը պատմել է իր երգերի ճանաչված լինելու մասին, խոսել է հայ ժողովրդի ճակատագրից և բացահայտել իր առողջության գաղտնիքը:
Այսօր երգիչը համերգ կտա Մոսկվայում, իսկ մայիսի 4-ին կներկայացնի իր նոր ալբոմը, որը նվիրվում է իր ոչ հեշտ անցյալին. ֆաշիզմի թեմաներ, պատերազմներ, Ցեղասպանությունից վերապրած հայ ժողովրդի պատմություն:
Խոսելով Ցեղասպանության մասին՝ շանսոնյեն ասել է. «Հայերը երբեք առանձնապես չեն խոսել Ցեղասպանության թեմայով, թեև պետք է ամաչեին նրանք, որոնք դա իրագործել են: Սակայն հարկ է նշել, որ հիմա Թուրքիայում արդեն կան մարդիկ, որ ընդունում են այդ փաստը: Եվ նրանց թիվն ավելանում է: հարկավոր է հասկանալ, որ երբ ես խոսում եմ Ցեղասպանության մասին, խոսում եմ այն մասին, որ դա չի ընդունվում պաշտոնական մակարդակով: Եվ ցանկանում եմ ասել, որ եթե չլիներ Ցեղասպանությունը, ապա Թուրքիայում շատ հայտնի երգիչ կլիներ՝ ես: Նրանք կորցրին հայ մտավորականոթյանը, նրանց չհաջողվեց նրանց ոչնչացնել: Մենք կարողացանք ողջ մնալ, սակայն նրանք կորցրին մարդկանց հայտնի անուններ, որոնք փախան այդտեղից ու կարող էին լինել այդ երկրի մասը:
Սակայն այդ ամենը անցյալում է, հիմա մենք 21-րդ դարում ենք, ու եկել է իրերին այլ կերպ նայելու ժամանակը: Մեր երկու ազգերը շատ ընդհանուր բան ունեն, ու ժամանակն է խոստովանել, թե ինչ է մեր մեջ եղել, հաղթահարել այդ արգելքն ու գնալ առաջ»:
Երգիչը մայիսին կդառնա 91 տարեկան: Իր տարիների մասին երգիչն ասում է այնպես, ինչպես բոլոր ֆրանսիացիները. «Ես չեմ ծերացել, պարզապես տարիքս է ավելացել», ընդ որում՝ նա չգիտի հավերժական երիտասարդության գաղտնիքը, սակայն գիտի առողջության գաղտնիքը:
«Ես բացել եմ առողջության գաղտնիքը, սակայն չեմ բացահայտել երիտասարդության գաղտնիքը, այդ գաղտնիքը մինչ օրս չի բացահայտվել, ցավոք»: Գաղտնիքը հետևյալն է՝ չանել չափազանց շատ հիմարություն, շատ չխմել, գինին հաճույքով խմել ու ընդամենը 1 բաժակ, չհարբել: Ես երբեք մինչև վերջ չեմ ուտում՝ ուտում եմ կերածիս կեսը, երբեք ուշ ժամի դուրս չեմ գալիս տնից: Դուք ինձ չեք հանդիպի գիշերային ակումբում: Ես 47 տարի առաջ թողել եմ ծխելը, իսկ մինչ այդ օրական ծխում էի 3 տուփ Gauloises: Ես չեմ զբաղվում սպորտով, ինձ ամբողջ կյանքում ասել են, որ չպետք է ուտել սուր, կծու ու քաղցր, սակայն ես ուտում եմ», – պատմում է Ազնավուրը: