ՀՀ նախագահի թեկնածու Րաֆֆի Հովհաննիսյանի նախընտրական շտաբի խոսնակ Հովսեփ Խուրշուդյանն այսօր լրագրողների հետ հանդիպմանը խոսեց նախընտրական քարոզարշավի ընթացքում հայտնաբերված խախտումների մասին: Նա նշեց, որ ընդհանուր թվով հայտնաբերվել է շուրջ 100 խախտում. «Քանի դեռ մենք չենք ահազանգում ոստիկանություն կամ ԿԸՀ, ոչինչ չեն ձեռնարկում խախտումների վերաբերյալ: Սակայն մեկ քաղաքական ուժը չի կարող ապահովել առանց խախտումների ընտրություններ: ԿԸՀ-ն այս օրերի ընթացքում միայն մի վարույթ է իրականացրել»:
Հովսեփ Խուրշուդյանի փոխանցմամբ՝ այսօր Էրեբունու 13-րդ ընտրատարածքից ահազանգ է ստացվել, որ ընտրամատյանը տրվել է հանձնաժողովի նախագահին, նոր միայն տեղամասային հանձնաժողովի նախագահին: Ասուլիսի մյուս բանախոսը՝ իրավախորհրդատու Կարեն Մեժլումյանն ասաց, որ նման արարքը պատժելի է՝ համաձայն Ընտրական օրենսգրքի:
Մեկ այլ խախտում է գրանցվել Էրեբունու թաղապետարանում, որտեղ գործող նախագահի նախընտրական շտաբը տեղակայված է թաղապետարանի մուտքի մոտ: Սա ևս կոպիտ խախտում է, քանի որ պետական հաստատություններին կից չի թույլատրվում նախընտրական շտաբ տեղակայել:
Հովսեփ Խուրշուդյանը փոխանցեց նաև, որ երկու օր առաջ Վանաձորում սկսվել է զանգվածային կաշառքի բաժանումը, որն իրականացվում է բնակֆոնդի պետի միջոցով. «Պետք չէ ջղագրգիռ միջոցների դիմել, միևնույն է, իշխանությունը դառնալու է ընդդիմություն, և դրանում ոչ մի սարսափելի բան չկա: Մենք արդեն 10 տարի է ընդդիմություն ենք, բայց կանք»:
