Վրացական Apsny.ge կայքի փոխանցմամբ, Վրաստանի Ազգային դեմոկրատական կուսակցության ներկայացուցիչ Գուրամ Չախվաձեն անդրադարձել է վերջին շրջանում վրաց-իսրայելական հարաբերություններում առաջացած լարվածությանը.
«Ես կողմնակից եմ նրան, որ բիզնեսին և խարդախությանը առնչվող բոլոր հարցերը դիտարկվեն իրավական հարթության վրա, և այդ խնդիրներով զբաղվի դատարանը: Նմանատիպ հարցերը չպետք է խնդիրներ ստեղծեն երկու երկրների միջև:
Նրանց համար դա շատ փոքր թեմա է, և կողմերը պետք է ուղիներ փնտրեն իրավիճակն առավել չբարդացնելու համար: Երկու երկրների միջև առկա են ոչ միայն քաղաքական, այլև մարդկային հարաբերություններ, և չպետք է ստվեր գցել դրանց վրա: Այդ տեսանկյունից պատասխանատու են թե´ Վրաստանի, թե´ Իսրայելի իշխանությունները»:
Հիշեցնենք, որ իսրայելական Elbit Systems զենք արտադրող ընկերությունը Մեծ Բրիտանիայի արդարադատության գերագույն դատարան (High Court of Justice) ընդդեմ Վրաստանի կառավարության դատական հայց է ներկայացրել, որում պահանջում է 100 միլիոն դոլարի փոխհատուցում:
Դրանից առաջ էլ Վրաստանում կաշառելու փորձ ձեռնարկելու համար դատապարտվել էին հրեա երկու գործարարներ: Այդ կապակցությամբ Իսրայելի արտգործնախարար Ավիգդոր Լիբերմանը հայտարարել էր, թե դա հնարովի մեղադրանք է իր հայրենակիցների նկատմամբ:
Իսկ ահա ապրիլի սկզբին Իսրայելը Վրաստանին ներառել է «սև ցուցակում»` իր քաղաքացիներին խորհուրդ տալով չայցելել Վրաստան: Իսրայելական կողմը դա «պատճառաբանեց» նրանով, որ Վրաստանում իր քաղաքացիները կարող են առևանգվել «Հիզբոլլահ»-ի և ՀԱՄԱՍ-ի ահաբեկիչների կողմից:
