Ուրալում երկնաքարի բեկորներ չեն ընկել. ինչպես հաղորդում է RIA Novosti-ն, այս մասին հայտարարել է Ռուսաստանի լիբերալ դեմոկրատական կուսակցության առաջնորդ Վլադիմիր Ժիրինովսկին և ընդգծել, որ իրականում ամերիկացիներն են զենք փորձարկել:
«Դրանք երկնաքարեր չեն ընկնում, դա ամերիկացիներն են նոր զենք փորձարկում: Երկուշաբթի Քերին (ԱՄՆ պետքարտուղար.- 1in.am) ցանկանում էր զգուշացնել, փնտրել է Լավրովին (ՌԴ արտգործնախարար.- 1in.am), Լավրովը շրջագայության մեջ է: Ցանկացել է զգուշացնել, որ կլինի նման պրովոկացիա, և այն կարող է վերաբերվել նաև Ռուսաստանին»,- ասել է Ժիրինովսկին:
Նրա խոսքերով՝ այնտեղ երբեք ոչինչ չի ընկնում, իսկ եթե ընկնում է՝ մարդիկ են անում:
Ավելի վաղ հաղորդվել էր, որ Չելյաբինսկի երկրամասում երկնաքարի անձրև է տեղացել, սակայն ավելի ուշ նշվել է, որ «անձրև» չի եղել, այլ այրվել է միայն մեկ երկնաքար: Ոստիկանությունում նշել են, որ երկնաքարի ընկնելու հետևանքով բժշկական օգնություն ստանալու համար դիմել է ավելի քան 400 մարդ:
