ՌԴ Քննչական կոմիտեն Ռուսաստանում անկարգությունների նախապատրաստման գործում որպես մեղադրյալ ներգրավել է վրացի քաղաքական գործիչ Գիվի Թարգամաձեին: Այս մասին հայտնում է Lenta.ru-ն՝ հղում անելով ՌԴ ՔԿ կայքին:
Ինչպես հայտնել են գերատեսչությունում, այժմ նրա դեմ հետախուզում է հայտարարվել: Առաջիկայում Քննչական կոմիտեն միջնորդություն կներկայացնի նրա հեռակա ձերբակալության վերաբերյալ:
Քննիչների տվյալներով, որոնք ստացվել են ՌԴ ԱԳՆ-ից, Թարգամաձեն զերծ է անձեռնմխելիությունից, թեև Վրաստանի խորհրդարանի անդամ է:
Քննության վարկածով՝ երեք ռուս ընդդիմադիրներ՝ Սերգեյ Ուդալցովը, Լեոնիդ Ռազվոզժաևն ու Կոնստանտին Լեբեդևը, Թարգամաձեի հետ պայմանավորվել են անկարգությունների ֆինանսավորման շուրջ: Ինչպես հավաստում են քննիչները, հանդիպումը կայացել է 2012-ի հունիսին: Գաղտնի տեսախցիկով նկարահանված հանդիպման տեսանյութը ցուցադրվել է «Բողոքի անատոմիա-2» ծրագրում: Քննիչները տեսանյութը վստահելի են համարում: Թարգամաձեն անձամբ վստահեցնում է, որ ծանոթ չէ ռուս ընդդիմադիրներին:
Բացի այդ, ՌԴ ՔԿ տվյալներով՝ Գիվի Թարգամաձեն կոնկրետ դեր է ունեցել մայիսի 6-ին Բոլոտնայա հրապարակում ցուցարարների և ոստիկանության բախումների կազմակերպման մեջ: Թե ինչ դեր է նա կատարել՝ քննիչները չեն հստակեցրել:
Այժմ Բոլոտնայա հրապարակում տեղի ունեցածի և անկարգությունների նախապատրաստման գործերը միացված են: Գործով անցնում է ավելի քան 20 մարդ:
