«Մինչև խորհրդարանական ընտրությունները մեկ տարի կա, և ցանկության դեպքում հնարավոր է բավականին բարելավել օրինագիծը, մանավանդ, որ մենք ունենք նախադեպեր, երբ օրինագիծը նորից վերադարձվում է առաջին ընթերցման, եթե կան լուրջ փաստարկներ և առաջարկություններ: Իսկ ԸՕ-ի այս փոփոխությունների հատ կապված առաջարկություններ և մտահոգություններ բավականին կան»,- «Գործընկերություն հանուն բաց հասարակության» նախաձեռնության կազմակերպած ԸՕ փոփոխությունների քննարկման ժամանակ կարծիք հայտնեց ԵՄԱ նախագահ Բորիս Նավասարդյանը:
Նրա գնահատմամբ, Հայաստանի ընտրական համակարգը բավականին հիվանդ է, և այն կառույցները, որոնք ապահովում են ընտրությունների արդյունավետ և օբյեկտիվ ընթացքը` կարող են հարմարվել ցանկացած ձևական փոփոխությունների, բայց կատարել նույնը, ինչ որ անում էին առաջ:
Նավասարդյանի խոսքերով, հարցի հիմնական լուծումը ընտրական ամբողջ գործընթացի առավելագույն թափանցիկությունն է: Նա նաև առաջարկեց, որ լինեն հեռուստաբանավեճեր բոլոր թեկնածուների միջև, և դա պետք է պարտադրված լինի օրենքով, տեսախցիկների առկայությունը ընտրատեղամասերում ևս անհրաժեշտ է:
Նավասարդյանը նշեց, որ ՀՌԱՀ-ը պետք է խիստ մոնիտորինգ իրականացնի լրատվամիջոցների շրջանում, և ցանկացած խախտում գտնելն ու գնահատելը շատ հեշտ է.
«Սակայն այդպիսի բան մեր պրակտիկայում չի եղել: Եթե հեռարձակող լրատվամիջոցների գործունեությունը կարգավորող մարմինը պարտավորված լինի անել դիտարկում և ընտրությունների հետ կապված ամեն մի թերացման անդրադարձ կատարի, ապա լուսաբանումը առավել համապատասխան կլինի օրենքներին»:
Նավասարդյանը նաև առաջարկեց, որ օրենսգիրքը կարգավորի ոչ միայն նախընտրական քարոզչության շրջանի լուսաբանումը, այլ ավելի շուտ, քանզի Հայաստանում նախընտրական արշավն արդեն սկսված է, բայց որևէ կարգավորում օրենսգրքով չկա. «Այս պայմաններում, արդեն մինչ քարոզչության սկսվելը շատ քաղաքական ուժեր լուրջ առավելություններ են ստանում մյուսների նկատմամբ»: