Այսօր լրանում է մեկ տարին այն օրվանից, երբ Սմոլենսկի օդանավակայանի մոտ կործանվեց Լեհաստանի նախագահի ինքնաթիռը, որի ժամանակ զոհվեց 96 մարդ, այդ թվում` 88 բարձրաստիճան պաշտոնյա: Լեհաստանի նախագահը պատրաստվում էր մասնակցել Կատինի ցեղասպանության զոհերի հիշատակի հարգանքի միջոցառումներին, որտեղ սպանվել էին հազարավոր լեհ սպաներ:
Այսօր Սմոլենսկում Կաչինսկու և Մեդվեդևի հանդիպման ժամանակ քննարկվել է նաև վերջերս երկու երկրների միջև ծագած սկանդալը: Բանն այն է, որ լեհական կողմը դժգոհել էր, որ ինքնաթիռի կործանման վայրում տեղադրված հուշարձանի հուշատախտակը փոխվել է, իսկ լեհերեն գրված տեքստը, որտեղ նշվում էր, որ Կաչինսկին պատրաստվում էր մասնակցել Կատինի ցեղասպանության զոհերի հիշատակին` հանվել էր նոր հուշատախտակի ռուսերեն տեքստից:
«Ոչ մեկի մոտ կասկած անգամ չպետք է լինի, որ Ռուսաստան պետությունը և ես` որպես նախագահ, սպառիչ պատասխաններ ենք տվել այն իրադարձությունների վերաբերյալ, որոնք տեղի են ունեցել, և թե ովքեր են դրանում մեղավոր», հայտարարել է Մեդվեդևն այդ կապակցությամբ:
«Այդ հանցագործության պատասխանատվությունը կրում է այն ժամանակվա խորհրդային պետության ղեկավարությունը, իսկ այլ վարկածներ ներկայացնելու փորձերը հիմնված չեն ո՛չ պատմական փաստաթղթերի, ոչ էլ փաստերի վրա», նշել է նա: Այս առումով նա շեշտել է այն փաստը, որ Ռուսաստանի իշխանություններին հաջողվել է մեծ առաջընթաց ապահովել «ստի հաղթահարման» և Կատինի ողբերգության նկատմամբ ընդհանուր դիրքորոշման մշակման համար:
Այս մասին հաղորդում է ITAR-TASS գործակալությունը:
