Ռուսական Vestikavkaza.ru կայքի փոխանցմամբ, ապրիլի 7-8-ին Թբիլիսիում տեղի ունեցած երկօրյա խորհրդաժողովի արդյունքում «Հարավ-կովկասյան երկաթուղի» և «Վրացական երկաթուղի» ընկերությունները համաձայնագիր են կնքել համագործակցության մասին: Այս մասին հայտարարել է «Հարավ-կովկասյան երկաթուղի» ՓԲԸ-ի մամլո ծառայությունը.
««Հարավ-կովկասյան երկաթուղի» ընկերության գլխավոր տնօրեն Շևքեթ Շայդուլինը և «Վրացական երկաթուղի» ընկերության գլխավոր տնօրեն Իրակլի Էզուգբաիան միմյանց միջև համագործակցության մասին պայմանագիր են ստորագրել: Դրանով կողմերը պատրաստակամություն են հայտնել համագործակցել մի շարք ոլորտներում. երկաթուղային բեռնափոխադրումների ծավալի զարգացում, շարժակազմ, ենթակառուցվածքներ, տեղեկատվության փոխանակում, տրանսպորտային ծառայությունների և երկաթուղային տրանսպորտի անվտանգության ոլորտում միջոցառումների որակի բարձրացում»:
Հանդիպման ժամանակ կողմերը նաև վճռել են հունիսի 15-ից մինչև սեպտեմբերի 30-ն ընկած ժամանակահատվածում Երևան-Բաթում-Երևան երթուղում գործարկել ամենօրյա ճեպընթաց: Բացի այդ, երեքշաբթի և ուրբաթ օրերին կգործի Երևան-Բաթում-Երևան հավելյալ մարդատար ուղերթը:
Մնացած բոլոր հարցերի քննարկումը տեղի կունենա մայիսի 15-ին, որին կմասնակցեն նաև երկու երկրների մաքսային և սահմանային ծառայությունների ներկայացուցիչները:
