«Գործընկերություն՝ հանուն բաց հասարակության» նախաձեռնության կազմակերպած ԸՕ փոփոխությունների վերաբերյալ քննարկումներին մասնակցում էր նաև ԱԺ ՀՅԴ խմբակցության ղեկավար Վահան Հովհաննիսյանը, որը ասաց, թե իրենք և «Ժառանգություն» խմբակցությունը չեն մասնակցել օրենքի նախագծի աշխատանքային խմբի աշխատանքներին, քանզի իրենց առաջարկությունները չէին ընդունվելու, և իրենք պետք է աշխատեին արդեն իսկ պատրաստ նախագծի վրա, որում պարզապես կոսմետիկ փոփոխություններ պետք է արվեին: Նա հիշեցրեց, որ իրենց միասնական տարբերակն են մշակել, հիմնական 11 կետերը ուղարկվել են Վենետիկի հանձնաժողով, սակայն իրենց ներկայացրած այլընտրանքային նախագիծը այդպես էլ չընդունվեց ԱԺ կողմից:
Հովհաննիսյանի գնահատմամբ, իրենց առաջ քաշած տարբերակի հակափաստարկները չափազանց անտրամաբանական են. «Բժիշկներից մեկը առաջարկում է հիվանդին բուժելու միակ տարբերակը, իսկ մյուսը նշում է, թե դա անհնար է, քանզի դրա հատևանքով հիվանդի քթին պզուկ կլինի: Այսօր նույն իրավիճակում է մեր և իշխանությունների բանավեճը: Մենք ասում ենք` միակ փրկությունը ընտրություններից հետո ընտրությանը մասնակցածների ցանկերը հրապարակելն է, սկսվում է հիստերիա, ասում են՝ ինչպես կարելի է խախտել ընտրությունների գաղտնիությունը»:
Հովհաննիսյանը ընդգծեց, որ ամբողջ աշխարհում ընդունում են, որ ընտրության գաղտնիությունը չի կարող խոչընդոտ լինել ավելի կարևոր իրավունքին` ընտրությունների միջոցով իշխանությունը փոխելու ժողովրդի իրավունքին:
Հովհաննիսյանը նաև արձանագրեց, որ ընտրատեղամասի տեսանկարահանումը ֆիքսում է միայն նրանց, ովքեր եկել են ընտրության, իսկ ընտրողների ցուցակի հրապարակումը ֆիքսում է չեկածներին. «Սրանք տարբեր բաներ են, և հենց այստեղ է խաբեության գաղտնիքը»:
ՀՅԴ-ական պատգամավորի գնահատմամբ, ԸՕ-ի այս փոփոխություններում ոչ մի նոր, իսկապես բարեփոխում չկա:
Նա նաև անդրադարձավ ընտրական հանձնաժողովների կազմավորման փոփոխություններին և նշեց, որ փորձ է արվում պատասխանատվությունը գցել ամենաստորին` տեղամասային հանձնաժողովի վրա, որտեղ էլ կուսակցությունների ներկայացուցիչներն են. «Որ վերջում սկսեն ափեռ-ցփեռ խոսակցությունները, թե կուսակցությունները մեր երկրում կայացած չեն»:
