Ուրբաթ օրը կայացած հանրահավաքում ամփոփելով ելույթը՝ Հայ ազգային կոնգրեսի առաջնորդ Լևոն Տեր-Պետրոսյանը հայտարարեց, որ մինչև հաջորդ հանրահավաքը, որը կկայանա ապրիլի 28-ին, Կոնգրեսը ակնկալում է, որ կկատարվեն «հանուն երկխոսության» իրենց կողմից առաջ քաշված երեք նվազագույն պահանջները, որոնք են՝ «քաղբանտարկյալների ազատ արձակումը, Ազատության հրապարակում հանրահավաքներ անցկացնելու իրավունքի վերականգնումը և մարտի 1-ի սպանությունները բացահայտելու պաշտոնական հավաստիացումը»:
«Եթե դա տեղի չունենա, ապա Հայ ազգային կոնգրեսը, սպառված համարելով երկխոսության հնարավորությունը, հարկադրված է լինելու կտրուկ փոխել իր մարտավարությունն ու գործողությունների բնույթը։ Մենք դեռևս հակված չենք իշխանության հետ վերջնագրի լեզվով խոսելուն, բայց ժողովրդի համբերությունն էլ չափ ու սահման ունի։ Ապրիլի 28-ը պետք է դառնա կա՛մ երկխոսության սկզբնավորման, կա՛մ էլ իշխանության ու հասարակության վերջնական ջրբաժանի օր»,- ասաց Լ. Տեր-Պետրոսյանը:
«Առաջին լրատվականը» Հայ ազգային կոնգրեսի ներկայացուցիչ, նախկին քաղբանտարկյալ Մյասնիկ Մալխասյանին նախ հարցրեց, թե իշխանությունները ինչո՞ւ չեն մինչ այժմ կատարել պահանջները, չէ՞ որ դա նաև իրենց է ձեռնտու. «Իշխանությունների վիճակը բավական ծանր է, քանի որ նրանք, հասկանալով, որ Ազատության հրապարակը անհնար է փակել, անգամ այս հարցում ի վիճակի չեն որոշում կայացնել`իմանալով հանդերձ, որ, այսպես թե այնպես, ժողովուրդը մտնում է հրապարակ: Բայց նույնիսկ այս պայմաններում իշխանությունները քաղաքապետարանին թույլ չեն տալիս արտոնել հանարահավաքներ անցկացնել այնտեղ, քանի որ դա իշխանության ներսում կդիտվի որպես թուլության արդյունք, և համակարգը կփլուզվի:
Առավել ևս մյուս պահանջի դեպքում` իշխանությունները կարծում են, որ քաղբանտարկյալների ազատարձակումը իրենց համակարգի ներսում կդիտվի որպես թուլության նշան: Բայց ես կարծում եմ, որ սա սխալ համոզմունք է, և դա ևս մեկ անգամ գալիս է ապացուցելու, որ իշխանությունները չեն մտածում երկրի ապագայի, արտաքին մարտահրավերների մասին, նրանք միայն մտածում են իրենց իշխանության պահպանման մասին: Եթե իշխանությունները խոհեմ լինեին, ապա պետք է վաղուց ազատ արձակեին քաղբանտարկյալներին, և երկիրը ծանր բեռի տակից ազատեին»:
Ինչ վերաբերում է Մարտի 1-ի ոճիրի բացահայտման հավաստիացումներին, սա շատ ավելի բարդ հարց է. «Բայց այս առումով իշխանությունները պետք է գիտակցեն, որ դժվար կլինի զսպել ժողովրդի բուռն ցասումը, որի ականատես եղանք վերջին հանրահավաքում, երբ ՀՀ առաջին նախագահը նշեց, թե որ դեպքում իշխանության և ընդդիմության միջև ջրբաժան կլինի: Իրոք, երկիրը կարող է գնալ արդեն համազգային անհնազանդության, և կարող է իրավիճակը հանգեցնել նրան, որ ոչ միայն այդ երեք պահանջները դրվեն, այլև առաջ քաշվի նրանց անհապաղ հրաժարականի խնդիրը: Այնպես որ, իշխանությունները պետք է մտածեն երկրի կայունության մասին, բայց հակառակն է`այսօր Հայ ազգային կոնգերսն է ավելի շատ շահագրգռված երկրի ներսում կայունությամբ, քան իշխանությունները: Հուսով եմ, որ ինչպես իշխանությունները թույլ տվեցին Ազատության հրապարակ մտնել, այնպես էլ մյուս հարցերը սահուն կլուծեն, որպեսզի հետագայում ժողովրդի ցասումը ավելի չմեծանա»,- նշեց Մյասնիկ Մալխասյանը: