ՀԱԿ համակարգող Լեւոն Զուրաբյանից լրագրողները հետաքրքրվեցին, թե ինչպես է ինքը պատկերացնում ռեժիմի տապալումը: Լեւոն Զուրաբյանը նշեց, որ ներքին եւ արտաքին քաղաքականության ձախողումների ֆոնին, երբ տեղի ունենա համաժողովրդական ընդվզում, ռեժիմը չի կարող հակադարձել այնպես, ինչպես դա արեց 2008 թ. մարտի մեկին: Նա հիշեցրեց, որ այն ժամանակ ռեժիմը վայելում էր միջազգային հանրության լիակատար աջակցությունը, այդ պատճառով էլ ժողովրդի դեմ գործած հանցագործությունների համար մնաց անպատիժ: ՀԱԿ համակարգողը նշեց, որ այսօր Սերժ Սարգսյանն իշխանությունը կարողանում է պահել միայն ռեպրեսիվ մեթոդներով, ընդդիմության ակտիվիստներին հետապնդելով, քաղաքականապես ակտիվ մարդկանց քաղաքականությունից հեռացնելով, աշխատանքից ազատելով: Սակայն, ըստ ՀԱԿ համակարգողի, այսօր դժգոհություն կա ուժային կառույցներում: «Այդ ռեպրեսիվ մեքենան ամեն օր քայքայվում է: Նրանք արդեն չեն հասկանում, թե հանուն ինչի պետք է ճնշեն ժողովրդին: Իսկ սա շատ կարեւոր գործընթաց է հեղափոխական իրավիճակի համար»,- ասաց նա: ՀԱԿ համակարգողը նշեց նաեւ, որ այն մարդիկ, որոնք շեշտում են, թե Հայաստանում իշխանափոխության համար նախադրյալներ չկան, ակամա նպաստում են, որ այդ նախադրյալները չստեղծվեն կամ չհզորանան: ՀԱԿ համակարգողը նշեց, որ ընդդիմությունը լուրջ չի վերաբերվում Ազատության հրապարակում իշխանությունների բեմադրած թատերական ներկայացումներին: Նա չբացառեց, որ Ազատության հրապարակում կարող են պաշտոնյաների ստրիպտիզներ էլ ներկայացնել: «Իրենց մտածելակերպով, իրենց մոտեցումներով դա էլ կանեն»,- ասաց նա: Իսկ ընդդիմությունն, ըստ ՀԱԿ համակարգողի, բոլոր քայլերն անում է Ազատության հրապարակը նվաճելու համար: Այդ հարցով նրանք դիմել են նույնիսկ եվրոպական կառույցներին:
