ՀՀ կրթության եւ գիտության նախարարությունում Վերահսկիչ պալատի կողմից անցած տարիներին իրականացրած ստուգումները ցույց են տվել, որ բավականին լուրջ խախտումներ կան ֆինանսավորման եւ շինարարության ոլորտներում: 2010թ. ուսումնասիրվել են ոչ պետական բուհերի եւ միջին մասնագիտական հաստատությունների հավատարմագրման գործընթացը եւ այդ հաստատությունների գործունեությունը: Նշենք, որ համաձայն օրենքով սահմանված կարգի` ուսումնական բնագավառում գործունեություն ծավալելու լիցենզիա ստանալու համար անհրաժեշտ է բավարարել որոշակի պայմաններ: Մասնավորապես, բուհի յուրաքանչյուր ուսանողի համար պետք է հասանելի լինի 8,02 քմ տարածք, պրոֆեսորադասախոսական կազմի առնվազն 50 տոկոսը պետք է լինեն տվյալ բուհի հիմնական դասախոսները, պրոֆեսորադասախոսական կազմի առնվազն 50 տոկոսը պետք է ունենա գիտական աստիճան կամ գիտական կոչում, բուհի լսարանների առաստաղի բարձրությունը 3 մետրից ցածր չպիտի լինի, եւ բուհը պետք է ունենա գրադարան եւ մարզադահլիճ:
«Եթե պայմանները լավը չեն եւ չեն բավարարում, ապա դրանք ուղղակի կերպով ազդում են ուսումնական պրոցեսի վրա, եւ արդյունքում մենք կունենանք ոչ թե կրթված երիտասարդներ, այլ իմիջիայլոց պատրաստված սերունդ»,- կարծիք հայտնեց ՎՊ նախագահ Իշխան Զաքարյանը եւ հավելեց, որ իրենց ուսումնասիրությունները ցույց են տվել, որ մի շարք բուհերում օրենքով սահմանված պայմաններ չեն պահպանվում, սակայն դրանք ունեն ուսումնական գործունեություն ծավալելու հավատարմագիր: