Քաղաքական առումով, ԱԺ արտահերթ ընտրություններ անցկացնելու մասին որոշակի պայմանավորվածություն կա ՀԱԿ-ի և իշխանությունների միջև:
Ավելին, այս պահին երկու կողմին էլ շահեկան է, որ արտահերթ խորհրդարանական ընտրություններ լինեն: Այս մասին այսօր հրավիրված ասուլիսում հայտարարեց «Ժառանգություն» կուսակցության փոխնախագահ Ռուբեն Հակոբյանը:
«ՀԱԿ-ի համար շահեկան է այն առումով, որ իրենք զիջեցին այն նշաձողը, որը մինչև այժմ զբաղեցնում էին: Այսինքն՝ արմատական ընդդիմության նշաձողը: Ահա այստեղ շատ շահեկան է, որ կարողանա այս պահին արտահերթ ընտրությունների մասնակցել և խորհրդարանում ապահովել այն քանակը, որը, իմ կարծիքով, պայմանավորվել է իշխանության հետ: Ես համոզված եմ, որ եթե չլինեն արտահեթ ընտրություններ, այլ լինեն հերթական ընտրություններ, այս բովանդակության արդյունքում, որ որդեգրել է ՀԱԿ-ը քաղաքական դաշտում արտահերթ ընտրությունների պահանջով, ինչպես ասում են, ՀԱԿ-ից կմնա կամուֆլյաժը: Ապրիլի 8-ի հանրահավաքին մարտի 17-ի հանրահավաքի համեմատ զգալիորեն պակասեց հանրահավաքի մասնակիցների թիվը: Եվ այս տենդեցը, կարծում եմ, շարունակվելու է նաև առաջիկայում»,- կանխատեսեց Ռուբեն Հակոբյանը:
Նրա խոսքերով, ԱԺ արտահերթ ընտրությունները ձեռնտու են նաև Հանրապետական կուսակցությանը: «Փետրվարի 17-ի կոալիցիայի հայտնի հուշագրից հետո ներիշխանական պայքարը բավական տեսանելի դարձավ: Ինձ համար գոնե տեսանելի չէ, որ ընտրությունների ժամանակ ՀԱԿ-ը կարող է շատ ավելի ձայներ հավաքել, քան ԲՀԿ-ն, բայց այդ հայտնի հուշագրի ստորագրումից հետո Հանրապետական կուսակցությունը ապահովեց իր դոմինատ դերը իշխանական կառույցում, և դրանից է կախված, թե կոալիցիոն ուժերից որ քաղաքական ուժը ինչ քանակությամբ ձայն կունենա պառլամենտում:
Կրկնում եմ՝ այն միջնորդավորված պայմանավորվածությունը, որը կա քաղաքական դաշտում, առայժմ ձեռնտու է երկուսին էլ»,- մանրամասնեց «Ժառանգության» փոխնախագահը և ներկայացրեց իր պատկերացումները, ինչպես ինքը նշեց՝ ՀԱԿ երևույթի մասին. «ՀԱԿ-ը, որպես երևույթ, որպես կուսակցությունների համախումբ, զուտ քաղաքական դիտարկումներով գոյություն չունի: Կա եսակենտրոն մի կառույց, որը առաջնորդվում է տոտալիտար, ամբողջատիրական սկզբունքներով, այս թվերը ընդամենը ֆոն են, որ ապացուցեն, թե համախումբ է»:
Ի դեպ, Ռուբեն Հակոբյանը հաստատեց, որ ներկա դրությամբ արմատական ընդդիմությունների միջև միավորումների քննարկումներ են գնում՝ քաղաքական այս զարգացումներում այլանս դառնալու համար: