60-ից ավելի ոչ կառավարական կազմակերպություններից կազմված Գործընկերություն հանուն բաց հասարակության նախաձեռնությունն այսօր քննարկում էր կազմակերպել՝ «Փոփոխություններ ընտրական օրենսգրքում. նոր երաշխիքներ ազատ, արդար ընտրությունների» թեմայով:
Նախաձեռնության անդամ, Հայաստանի Հելսինկյան կոմիտեի նախագահ Ավետիք Իշխանյանը նկատեց, որ անկախացումից ի վեր Հայաստանում ընտրություններն ամենամեծ խնդիրներից են եղել: Նա հիշեցրեց, որ միջազգային դիտորդները միշտ էլ սուր գնահատականներ են տվել հայաստանյան ընտրությունների անցկացմանը, բայց իշխանությունները օգտվել են միայն այդ զեկույցների առաջին մասից, որտեղ արձանագրվում է, որ ընտրությունները մեկ քայլ առաջ էին:
Իշխանյանի գնահատմամբ, մինչ օրս անցկացված ընտրությունները ոչ թե մի քայլ առաջ են եղել, այլ մի քայլ հետ, և Ընտրական օրենսգրքի փոփոխությունը պետք է հնարավորինս լրացնի այն բացերը, որոնք ընտրակեղծիքների պատճառ են դառնում:
Հայաստանի Հելսինկյան կոմիտեի նախագահը հիշեցրեց, որ ԵԽ-ին անդամակցելու օրվանից Հայաստանի իշխանությունների առջև դրվել են մի շարք պարտավորություններ, և Հայաստանը պետք է երեք տարի մնար մոնիտորինգի տակ. «Մինչ օրս Հայաստանը մոնիտորինգի տակ է և հաճախ լիարժեքորեն չի կատարել իր առջև դրված պարտավորությունները: ԸՕ-ի փոփոխությունը ևս մտնում է այդ պարտավորությունների մեջ, և մեր քննարկումները ցույց կտան, թե ինչքանով է կատարվում այդ պարտավորությունը»:
Ա. Իշխանյանը շեշտեց, որ ԸՕ-ի փոփոխության անհրաժեշտությունը նշված է նաև 2008 թ. նախագահական ընտրություններից հետո ԵԽԽՎ 1609 բանաձևում, որում իշխանություններին ուղղված պահանջ կա՝ վերականգնել վստահությունը ընտրությունների նկատմամբ: