Ռուսական Kavkaz-uzel.ru կայքի հաղորդմամբ, ադրբեջանական իրավապաշտպաններն անմիջապես արձագանքել են ԱՄՆ պետդեպարտամենտի «Մարդու իրավունքների» զեկույցին:
Ադրբեջանական իրավապաշտպան, «Թղթակիցների ազատության ու անվտանգության ինստիտուտի տնօրեն» Էմին Հուսեյնովը, մեկնաբանելով այդ զեկույցը, նշել է, որ այդ փաստաթուղթն արտացոլել է ադրբեջանական ներկայիս իրականությունը.
«Դժբախտաբար, մեր երկրում գնալով նկատվում է մարդու իրավունքների խախտմանն առնչվող իրավիճակի վատթարացում: Պետական մարմինները լրագրողներին դասակարգել են երկու տիպի` իրենց հանդեպ լոյալ տրամադրվածների և ընդդիմադիրների: Վերջիններս չեն հրավիրվում պետական մարմինների միջոցառումներին, նրանց հարցերն անարձագանք են մնում:
Ռադիոն և հեռուստատեսությունը նույնպես գտնվում են իշխանության վերահսկողության տակ: Հեռարձակումներ կազմակերպել ցանկացող անկախ կառույցներին համապատասխան արտոնագրեր չեն տրվում: Դրանով բնակչությունը զրկվում է այլընտրանքային տեղեկատվական աղբյուրից:
2011 թվականի սկզբից ի վեր, Ադրբեջանում իրավիճակն էլ ավելի է վատացել, քանի որ վերականգնվել է վերջին 4 տարում մոռացված լրագրողների առևանգման ու ծեծի պրակտիկան: Օրինակ՝ 10 օրվա ընթացքում` մարտի 26-ից ապրիլի 4-ը, դաժան ծեծի են ենթարկվել ընդդիմադիր «Ազադլիք» թերթի աշխատակիցներ Սեյմուր Խազիևն ու Ռամին Դեկոն»:
Խաղաղության ու ժողովրդավարության ինստիտուտի տնօրեն Լեյլա Յունուսն իր հերթին նշում է, որ քաղբանտարկյալների թիվը չի նվազում, քանի որ ազատ արձակվածներին փոխարինում են նորերը.
«Ադրբեջանի իրավապաշտպան կազմակերպությունների դաշնության տվյալներով, բանտերում են գտնվում 60 քաղբանտարկյալներ: Նրանց կարող են միանալ ևս 12-ը, որոնցից 10-ը Իսլամական կուսակցության ղեկավարներ ու ակտիվիստներ են: Նրանք հիմնականում ձերբակալվել են 2011 թվականի հունվարին, որոշ մասն էլ` փետրվարին ու մարտին: Այդպիսի պոտենցիալ ունեն ապրիլի 2-ին ընդդիմության ցույցի ժամանակ ձերբակալված 5 ընդդիմադիրներ»:
Հիշեցնենք, որ այդ զեկույցում հերթական անգամ ընդգծվել է, որ 2010 թվականի նոյեմբերի 7-ին կայացած խորհրդարանական ընտրությունները չեն համապատասխանել ժողովրդավարական պահանջներին, և որ իշխող կուսակցությունը գերակայում է քաղաքական համակարգում: