Լիոնի հայտնի Անտոնեն Պոնսե հրապարակում գտնվող Հայոց ցեղասպանության հուշակոթողը դարձյալ պղծել են: Հուշարձանի վրա տեղ-տեղ կատարել են հայհոյալից և վիրավորական արձանագրություններ: Այս մասին տեղեկացնում է ֆրանսիական «Յառաջը»։
Հուշակոթողը տեղադրվել էր Լիոնի քաղաքապետարանի հովանավորությամբ, և 2006-ի ապրիլին դրա բացման արարողության առթիվ տեղի էր ունեցել շրջանի ժխտողական կազմակերպությունների կողմից կազմակերպված բողոքի ցույց, որն ըստ երևույթին վայելում էր թուրք սպասարկուների աջակցությունը: Ժխտողական այդ ցույցի մասնակիցները բախվել էին լիոնցի լիսեականների շարժմանը, որը վրդովված էր այդտեղ հնչած կարգախոսներից:
Ժխտողական այդ ցույցին զուգահեռ՝ նաև վիրավորական արձանագրություններ էին կատարվել հուշակոթողի վրա:
Հարյուրամյակի արարողություններից առաջ այս նոր պղծումը ցույց է տալիս, որ ժխտողականությունը պատժող օրենքի բացակայության ներկա պայմաններում ոճրագործները մտադիր չեն դադարեցնել իրենց արարքները: