Ռուսական Kavkaz-uzel.ru կայքի հաղորդմամբ, ապրիլի 8-ին հրապարակված ԱՄՆ Պետդեպարտամենտի «Մարդու իրավունքների» զեկույցում Ադրբեջանը սուր քննադատության է ենթարկվել` մարդու իրավունքները կոպտորեն ոտնահարելու համար:
Ադրբեջանի վերաբերյալ հատվածում նշված է, որ Ադրբեջանում սահմանափակվում են խոսքի ու հավաքների ազատությունը, քաղաքական կուսակցությունների գործունեությունը և խաղաղ իշխանափոխությանն առնչվող քաղաքացիների իրավունքները:
Զեկույցում նաև նշված է այն մասին, որ կոռուպցիան շարունակում է մնալ արդարադատության մարմիններում և իրավապահ կառույցներում: Ադրբեջանական կառավարությունը սահմանափակում է նաև կրոնական ազատությունները, մարդավաճառության խնդիրը դեռ չի վերացվել:
Նախորդ տարի ադրբեջանական ոստիկանական բաժանմունքներում ու ռազմական բանտերում մահացել է նվազագույնը 7 մարդ: Դրանցում կտտանքների է ենթարկվել 169 բանտարկյալ:
Բանտերում շարունակում են պահպանվել ծանր պայմանները, որոնք մի շարք դեպքերում սպառնում են բանտարկյալների կյանքին: Բանտերում առկա հիմնական խնդիրները վերաբերում են սննդին, ջեռուցման ու օդափոխության բացակայությանը, բժշկական ծառայության ներթափանցման արգելքին: Նշվում է, որ որոշ դեպքերում էլ ձերբակալվածներին առանց սննդի և անքուն պահել են նկուղներում` անհրաժեշտ ցուցմունքներ կորզելու համար:
Արդարադատության նախարարության տվյալներով 2010 թվականին ադրբեջանական բանտերում մահացել է 106 մարդ, ինչը 19 տոկոսով ավելին է` համեմատած 2009 թվականի հետ: Կառավարությունն իր հերթին նշել է, որ պատժել է ՆԳՆ 276 աշխատակցի` մարդու իրավունքների խախտման պատճառով ստացված 174 բողոքների հիման վրա: Ընդ որում, 20 ոստիկանական սպաներ վտարվել են իրենց աշխատավայրից: Միևնույն ժամանակ չի նշվում, թե կոնկրետ քանի հոգու են պատասխանատվության ենթարկել` մարդու իրավունքների խախտման համար:
Չնայած նախորդ տարի ազատ են արձակվել 11-14 քաղբանտարկյալներ, այնուամենայնիվ, ադրբեջանական բանտերում շարունակում են գտնվել 20-46 քաղբանտարկյալներ, որոնց մեծ մասն այնտեղ գտնվում է արդեն 10-15 տարի:
2010 թվականին գրանցվել է լրագրողներին վիրավորելու ու նրանց նկատմամբ ֆիզիկական ուժ գործադրելու 106 միջադեպ, ինչը կրկնակի անգամով ավելին է, քան` 2009 թվականին:
Լրագրողներին ահաբեկելու նպատակով 2010 թվականին նրանց դեմ հարուցվել է 40 քրեական գործ: Կառավարությունը մի շարք դեպքերում խոչընդոտել է ընդդիմադիր թերթերի տպագրմանը: Դա նաև վերաբերում է ընդդիմադիր ինտերնետային կայքերի գործունեությանը:
Ադրբեջանի կապի նախարարության տվյալներով, երկրի բնակչության 45 տոկոսն օգտվում է ինտերնետի ծառայություններից, և յուրաքանչյուր 100 անձին բաժին է ընկնում 14 համակարգիչ:
Կառավարությունը լուրջ խնդիրներ է հարուցում ընդդիմադիրների, հասարակական կազմակերպությունների ու կրոնական ակտիվիստների միտինգների անցկացման հարցում:
