Քվենտին Ջերոմ Տարանտինոն ծնվել է 1963-ի մարտի 27-ին՝ Նոքսվիլում (ԱՄՆ Թենեսի նահանգ): Ծննդյան իսկ օրից նա կապվել է կինոյի հետ՝ նրան անվանակոչել են ի պատիվ Gunsmoke սերիալի հերոսի՝ Քվինտ Ասփերի: Մեծանալով՝ նա վերցրեց մեկ այլ անուն՝ Քվենտին։ Այս մասին գրում է Calend-ը:
Ութ տարեկանից տղան կանոնավոր կերպով կինոթատրոններ էր հաճախում՝ բաց չթողնելով ոչ մի պրեմիերա։ 16 տարեկանում նա արդեն աշխատում էր տեսաարխիվում՝ հասանելություն ստանալով ցանկացած ֆիլմի։ Այդ ժամանակից նա հաճախել է դերասանի վարպետության դասընթացների և հենց այնտեղ էլ հասկացել, որ ֆիլմում գլխավորը սյուժեն է: 1986-ին նա գրել է իր առաջին սցենարը և սկսել «Իմ լավագույն ընկերոջ ծննդյան օրը» իր առաջին սիրողական ֆիլմի նկարահանումները, սակայն այդպես էլ դա մինչև վերջ չի հասցրել:
Շարունակելով սցենարներ գրել՝ նա վաճառում է դրանք` սեփական ֆիլմը նկարահանելու համար: Այդ ֆիլմը դարձավ «Կատաղի շները», որի պրեմիերան տեղի ունեցավ 1992-ին:
1994-ին թողարկված «Հանցագործ բովանդակություն» ֆիլմը ֆենոմենալ հաջողություն ունեցավ։ Այդ ֆիլմով սկսվեց անկախ կինոյի պատմության նոր դարաշրջանը: Այն շատ մրցանակների է արժանացել, այդ թվում նաև «Օսկար»-ի՝ «Լավագույն սցենարի համար», և Կաննի կինոփառատոնում՝ Արմավենու ոսկե ճյուղի: