Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին CNBC-ին տված հարցազրուցյում նշել է այն անձանց անունները, որոնցից նա ոգեշնչվում է.
«Իմ ոգեշնչման աղբյուրները շատ են: Իմ ակադեմիական փորձից կարող եմ ասել, որ դա Բուրգետ Ալին է, որը, փրկվելով Հոլոքոսթից, ԱՄՆ-ում դարձավ հիանալի միջազգային դատավոր, մարդու իրավունքների պաշտպան:
Բացի այդ, ես շատ բան եմ սովորել այլ պատմական ֆիգուրներից: Դա, մասնավորապես, վերաբերում է թուրքական պետության հիմնադիր Մուսթաֆա Քեմալ Աթաթուրքին, Իսրայելի ու Սինգապուրի հիմնադիրներին, ինչպես նաև երիտասարդ ժողովրդավարությունների հիմնադիրներին` որպես օրինակ նշելով Էստոնիան»:
Հիշեցնենք, որ Վրաստանի նախագահ դառնալուց հետո 2006 թվականի դեկտեմբերին այցելելով Թուրքիա` Սաակաշվիլին այցելեց Աթաթուրքի դամբարան` հայտարարելով, որ նա իր իդեալն է.
«Մեզ նման ժողովուրդների համար նա օրինակ է հանդիսանում: Նա 20-րդ դարի «ամենամեծ» պետական գործիչներից է: Վրաստանը պետք է հետևի Թուրքիայի անցած ուղուն: Վրաստանի նման երկրներին կարող են միայն զարգացնել Աթաթուրքի իրականացրած արմատական բարեփոխումները»: