Հինգշաբթի երեկոյան լրագրողների հետ զրույցում ՄԱԿ-ի գլխավոր քարտուղար Պան Գի Մունը կոչ է արել Սիրիայի նախագահ Բաշար Ասադին՝ չարդարացնել բռնությունը սեփական ժողովրդի հանդեպ, որ իրականացվում է ահաբեկիչների դեմ պայքարի ընթացքում:
Պան Գի Մունը հույս է հայտնել, որ Սիրիայի իշխանությունները կընդունեն ընդդիմության առաջնորդներից մեկի երկխոսության առաջարկը, և որ սիրիացիները, տարածաշրջանի առաջնորդներն ու Անվտագության խորհուրդը կկարողանան հաղթահարել տարաձայությունները ճգնաժամից դուրս գալու ճանապարհի վերաբերյալ: Այս մասին հայտնում է Trend գործակալությունը՝ հղում անելով կազմակերպության մամլո ծառայությանը:
«Լախդար Բրահիմին կշարունակի ակտիվ աշխատել Անվտանգության խորհրդի, ընդդիմության և տարածաշրջանի առանցքային կողմերի հետ: Սակայն խնդիրը տարածաշրջանում, Սիրիայի ներսում, ինչպես նաև Անվտանգության խորհրդի անդամների շարքում առկա տարաձայնություններն են: Եթե այդ հակասությունները չհանվեն, մենք լուծման ձեռքբերման լավ հեռանկար չենք ունենա: Շուտով մենք կթևակոխենք այդ ճգնաժամի երրորդ տարին»,- հայտարարել է Պան Գի Մունը: Նա հիշեցրել է Սիրիայում քաղաքացիական անձանց սպանությունների, փախստականների և ավերածությունների մասին:
Պան Գի Մունն ընդգծել է, որ Սիրիայում ահաբեկչական գործողությունները իրավունք չեն տալիս Ասադին սպանել սեփական ժողովրդին: ՄԱԿ-ի գլխավոր քարտուղարը հիշեցրել է, որ Սիրիայում ճգնաժամը սկսվել է ոչ ահաբեկչական խմբերի պատճառով, որոնք երկիր են մտնել ավելի ուշ և սկսել մասնակցել մարտերին:
