ՀՀՇ վարչության անդամ Գևորգ Գևորգյանը, խոսելով Հայ ազգային կոնգրեսի ուրբաթ օրվա հանրահավաքի տպավորությունների մասին, կարծիք հայտնեց, որ հասարակությունը բավարարված էր:
«Հանրահավաքին պարզ դարձավ առայսօր հուզող շատ հարցերի պատասխան: Ավելին` մարդկանց մոտ բարձրացավ ոգևորությունն ու հույսը, որ պայքարը մոտ ապագայում հաջողությամբ է պսակվելու: Հաղթանակը մեր սեփական ուժերով կռելու ենք»,- ասաց Գևորգյանը:
Խոսելով իրենց մարզում` Արագածոտնում և մասնավորապես Ապարանում հանրահավաքի վերաբերյալ արձագանքների մասին` Գևորգ Գևորգյանը նշեց. «Մեր մարզը` որպես ակտիվ մարզ, մշտապես մասնակցում է հանրահավաքներին: Իսկ այն կարծիքները, թե գյուղատնտեսական աշխատանքները խանգարելու են հանրահավաքին մասնակցելու` սխալ էին: Մեր ժողովուրդը տղամարդավարի տրամադրված է այս գործը հասցնելու իր տրամաբանական ավարտին, քանի որ մինչև չլուծվի երկրում իշխանափոխության և արտահերթ ընտրությունների հարցը, չեն լուծվի մյուս բոլոր խնդիրները»,- ասաց պարոն Գևորգյանը: