Ադրբեջանական Radioazadlyg.org կայքի հաղորդմամբ, ԵՄ-ն անհանգստացած է Ադրբեջանում քաղաքացիական ազատությունների խախտումից:
«ԵՄ-ն անհանգստացած է ապրիլի 2-ին Բաքվում կայացած խաղաղ ցույցի բռնի ցրումից: Ցույցի բազմաթիվ մասնակիցներ ձերբակալվել և վարչական պատիժներ են ստացել: Մենք Ադրբեջանին կոչ ենք անում անմիջապես ազատ արձակել ձերբակալված քաղաքացիներին»:
Բացի այդ, ԵՄ-ը Ադրբեջանին կոչ է արել անհրաժեշտ պայմաններ ստեղծել լրագրողների անվտանգության համար, որպեսզի նրանք կարողանան ազատորեն իրականացնել իրենց պարտականությունները: Նրանց պետք է համապատասխան երաշխիքներ տրվեն.
«Սրա հետ կապված` ԵՄ-ը լրջորեն մտահոգված է «Ազադլիք» թերթի լրագրողներ Սեյմուր Խազիևի ու Ռամին Դեկոյի դաժանաբար ծեծի ենթարկվելու կապակցությամբ: Մենք Ադրբեջանին կոչ ենք անում հրապարակավ քննադատել այդ դեպքերը և անել հնարավոր ամեն ինչ` մեղավորներին պատասխանատվության ենթարկելու, ինչպես նաև այսուհետ նմանօրինակ դեպքերը կանխելու համար»:
ԵՄ-ը նաև պատրաստակամություն է հայտնել Ադրբեջանում աջակցել ժողովրդավարական բարեփոխումների գործընթացին` կոչ անելով շարունակել այդ գործընթացը:
Հիշեցնենք, որ ԵՄ-ը Ադրբեջանին խստորեն դատապարտել էր նաև մարտի 17-ին, երբ ձերբակալվել էին մի շարք երիտասարդներ:
Երեկ հրապարակված ԱՄՆ Պետդեպարտամենտի 2010 թվականի «մարդու իրավունքների» զեկույցում հերթական անգամ ընդգծվել է, որ 2010 թվականի նոյեմբերի 7-ին Ադրբեջանում կայացած խորհրդարանական ընտրությունները չեն համապատասխանել ժողովրդավարության պահանջներին:
