«Երեք տարի շարունակ Սերժ Սարգսյանը սեփական ժողովրդի հետ ճակատամարտի մեջ է եղել: Որևէ բան չի արել, որ Հայաստանի ներքաղաքական իրավիճակը կարգավորվի, սոցիալական ծանր վիճակը բարելավվի, քաղբանտարկյալներին ազատ չի արձակել, հանրային վայրերը, որտեղ մարդիկ իրավունք ունեն իրականացնել իրենց սահմանադրական իրավունքները, փակված են»,- «Առաջին լրատվականի» հետ զրույցում կարծիք հայտնեց ՀԱԿ անդամ Արշակ Բանուչյանը` գնահատելով Սերժ Սարգսյանի պաշտոնավարման և երդմնակալության երեք տարին:
Բանուչյանի գնահատմամբ, այս երեք տարիների ընթացքում Հայաստանի շահերը արտաքին հարաբերություններում չեն բարձրացվում, Ղարաբաղի հարցում անընդհատ կորուստներ ենք ունենում, իսկ հասարակության մեջ այս իշխանությունների նկատմամբ մեծ դիմադրություն կա: Նրա խոսքերով, իրական գնահատականը հենց ժողովուրդն է տալիս իր գործողություններով:
Բանուչյանի կարծիքով, Հայաստանի շահերից է բխում, որ Սերժ Սարգսյանի երդմնակալության և պաշտոնավարման չորրորդ տարին չգա, և Սերժ Սարգսյանը քաղաքական բարձր գիտակցություն ունենա, որպեսզի կարողանա երկխոսության ճանապարհ գտնել ժողովրդի հետ:
«Երեկվա հանրահավաքին երեք պահանջներ են դրվել, և դրանք կատարելու դեպքում կարելի է ժողովրդի հետ երկխոսության գնալ, սեփական ժողովրդի հետ հաշտության գնալ, փորձել ճանապարհներ գտնել, որպեսզի երկրում իսկապես վերականգնվեն սահմանադրական կարգերը:
Կարծում եմ, որ այդ չորրորդ տարվա որոշում կայացնողը լինելու է ժողովուրդը»,- եզրակացրեց Բանուչյանը:
