Վրացական Apsny.ge կայքի հաղորդմամբ, Վրաստանի հայ համայնքը երկրորդ տարին անընդմեջ խնդրանքով դիմում է Վրաստանի նախագահին ու խորհրդարանին`«Օսմանյան կայսրությունում Հայոց ցեղասպանության» հարցի դիտարկման համար:
«Վրաստանի հայ համայնք» կազմակերպությունը հայտարարել է, որ այդ նամակն ուղարկվել է երկրի նախագահին, խորհրդարանի խոսնակին, խորհրդարանական խմբակցություններին, ինչպես նաև Վրաստանի խորհրդարանում ներկայացված հայազգի խորհրդարանականներին:
Նամակում մասնավորապես նշված է. «Մենք` «Վրաստանի Հայ համայնք» կազմակերպությունից ներքոստորագրյալներս, հանուն արդարադատության և ժողովրդավարական արժեքների կոչ ենք անում Ձեզ` միանալու միջազգային քաղաքակիրթ հանրության նախաձեռնությանը և Վրաստանի խորհրդարանում նախաձեռնել Օսմանյան կայսրության տարածքում Հայոց ցեղասպանության հարցի քննարկումը»:
Իսկ Վրաստանի հայկական կազմակերպությունները վրացական խորհրդարանի հայազգի խորհրդարանականներին կոչ են արել մինչև ապրիլի 24-ը խորհրդարանի նիստի ժամանակ հանդես գալ համապատասխան հայտարարությամբ` խորհրդարանին կոչ անելով հարգել 1915-1923 թվականներին տեղի ունեցած Հայոց ցեղասպանության անմեղ զոհերի հիշատակը»:
Ուղերձի նախաձեռնողը «Վրաստանի Հայ համայնք» հասարակական կազմակերպությունն է, որին միացել են նաև «Վրաստանի Հայկական համագործակցության կենտրոնը», «Վրաստանի Հայ ուսանողական միությունը», «Վրաստանի Հայ պատանիների միությունը», «Վրաստանի Հայկական երիտասարդական միությունը», «Վիրահայերի միավորում «Նոր Սերունդ» և «Թբիլիսյան հայերի վեհաժողով»» կազմակերպությունը:
Պետք է նշել, որ վրացական իշխանությունները հազիվ թե բավարարեն վիրահայերի խնդրանքը և վտանգի տակ դնեն թուրք-վրացական ջերմ հարաբերությունները: Դա առավել ակնառու է` հաշվի առնելով թուրքական կողմի այն ժեստը, երբ հայտարարեցին, որ Սերգեյ Բաղապշի թուրքական այցի ժամանակ թուրք բարձրաստիճան պաշտոնյաները չեն հանդիպելու նրա հետ, որպեսզի դրանով իսկ չառաջացնեն վրացական իշխանությունների դժգոհությունը: