Այսօր լրանում է Սերժ Սարգսյանի երդմնակալության երեք տարին: ՀԱԿ ներկայացուցիչ Անդրանիկ Քոչարյանի գնահատմամբ, այս երեք տարիների ընթացքում Սերժ Սարգսյանը չի իրականացրել իր տված և ոչ մի խոստում. «Նա պետք է պատժեր մարտի 1-ի հանցագործներին` անկախ իրենց զբաղեցրած դիրքից, պաշտոնից և կարգավիճակից, բայց, ըստ էության, այս երեք տարվա ընթացքում որևէ ակնառու բան նրա կողմից չիրականացվեց: Ավելին` իրավական համակարգում ավելի խորացավ անօրինական դրսևորումների շրջանակը. դրա վառ ապացույցը Թամամյանի հետ կապված իրադարձություններն են, բանակում իրավիճակը չլավացավ, ոչ մի լավ բան չկա»:
«Առաջին լրատվականի» հետ զրույցում Քոչարյանը նշեց, որ երեք տարին բավարար ժամանակ էր` հասկանալու համար այս իշխանությունների թե՛ էությունը, թե՛ բովանդակությունը. «Մեր երկիրն այդքան ռեսուրս չունի դիմանալու չորրորդ և հինգերորդ տարվան: Բոլորը հասկացել են, որ այս երեք տարիների ընթացքում իշխանությունները որևէ քայլ չիրականացրին երկրի ներսում արդարության հաստատման, սոցիալական խնդիրների լուծման, կլանային համակարգի ոչնչացման ուղղությամբ»:
Քոչարյանի խոսքերով, իշխանությունների ժամանակը սպառված է և դեռ մի բան էլ անցել է. «Մեր պետությունն ու ժողովուրդը ավելորդ ժամանակ չունեն, որպեսզի լրացուցիչ հնարավորություն տան իշխանություններին երկու տարի էլ անիմաստ ժամանակ մսխել` պարզապես հարստացնելով որոշակի խմբերի, որոնք, ըստ էության, մեր պետության և ժողովրդի հետ որևէ կապ չունեն»:
Ըստ ՀԱԿ ներկայացուցչի` դա է պատճառը, որ ՀԱԿ շարժումը չի մարում, և անընդհատ նոր շերտեր են միանում: Նրա գնահատմամբ, ընդդիմությունը այս երեք տարիների ընթացքում հետևողական պայքար է իրականացրել, հասել է նրան, որ քաղբանտարկյալների մեծ մասը ազատ արձակվեցին. «Հասարակությունն այսօր էլ համախմբված իր պայքարը շարունակում է, և կարծում եմ, որ ընդդիմության հետևողական քայլերի արդյունքում երկրում կհասնենք լուրջ բարեփոխումների, կստիպենք իշխանություններին հեռանալու, և արդար ընտրությունների արդյունքում կձևավորվի իշխանություն, որն էլ ի վիճակի կլինի երկիրը հանել այս խորը ճգնաժամից»: