Հարավային Կովկասում Եվրոպական խորհրդարանի պատվիրակության նախագահ Սաջաթ Քարիմն «Առաջին լրատվական»-ի հետ զրույցում ասաց, որ Եվրամիության ներկայացուցիչների մատնանշած տարբերակված մոտեցումն իրականում ձեռնտու տարբերակ կլինի Արևելյան գործընկերության անդամ պետությունների համար:
Նրա խոսքով՝ Եվրամիությունն իսկապես գիտակցում և հասկանում է Արևելյան գործընկերության անդամ երկրների հետ հարաբերությունների խորացման անհրաժեշտությունը և դրան վնասող որևէ գործընթաց չի ծավալում։
«Իհարկե, մենք պետք է հաշվի առնենք յուրաքանչյուր երկրի առանձնահատկությունները: Անխոս, կան տարբերություններ այդ երկրների միջև, և դրանք հաշվի չառնել հնարավոր չէ: Մենք պետք է գտնենք մի տարբերակ, որն ամենակարևորն ու ամենաընդունելին կլինի բոլոր կողմերի համար: Մենք չենք կարող հաշվի չառնել այն ամենը, ինչ տեղի է ունենում Վրաստանի տարբեր մասերում, այն ամենը, ինչ տեղի է ունենում Ուկրաինայում, Ղրիմում»,- ասաց նա:
Քարիմի խոսքով՝ տարբերակված մոտեցումն իրենից չի ներկայացնում սարսափելի կամ արտասովոր որևէ բան, և այն հաճախ անհարկի այլ մեկնաբանություններ է ստանում. «Իսկապես, հարկավոր է երկրներին ցուցաբերել տարբերակված մոտեցում: Բայց դա արտասովոր բան չէ կամ իրենց վատ բան չի ենթադրում: Հաշվի առնելով տվյալ երկրի, նույնիսկ տարածաշրջանի իրավիճակը՝ մենք շահեկան տարբերակ և մոտեցում կցուցաբերենք»:
Մեզ հետ զրույցում Սաջաթ Քարիմը վերհիշեց, որ Հայաստանը, մի քանի պատճառներից ելնելով, հրաժարվեց ստորագրել Եվրամիության հետ Ասոցացման համաձայնագիրը: Միևնույն ժամանակ մեր զրուցակիցը հույս հայտնեց, որ այս անգամ ՀՀ իշխանությունները կխորացնեն և կզարգացնեն արդեն իսկ առկա համագործակցությունը:
«Եվրոպական միության անունից կարող եմ ասել՝ մենք պատրաստակամ ենք Հայաստանի հետ զարգացնել հարաբերություններ, մենք ուզում ենք Հայաստանի հետ խորը, նշանակալից համագործակցություն: Սա մի գործընթաց է, որն արդեն սկսվել է, և որն անպայման շարունակություն կունենա: Հուսով ենք նաև, որ Հայաստանը ևս պատրաստակամ կլինի Եվրոպայի հետ ավելի խորը համագործակցել: Կաշխատենք իրականացնել բոլոր անհրաժեշտ քայլերն այդ համագործակցությունն ավելի սերտ դարձնելու համար»: