Ուրբաթ օրը ԲՀԿ-ում տեղի կունենա ներկուսակցական իշխանափոխության վերջին արարը՝ԲՀԿ խմբակցությունում կընտրվի նոր նախագահ և նոր քարտուղար: Մարտի 5-ին տեղի ունեցած ԲՀԿ 8-րդ արտահերթ համագումարում ԲՀԿ նախագահ Գագիկ Ծառուկյանը հայտարարեց, որ ինքը վայր է դնում ինչպես կուսակցության նախագահի, այնպես էլ խմբակցության ղեկավարի պարտականությունները: ԲՀԿ-ն մտադիր է մարտի 23-ի ԱԺ հերթական քառօրյային մասնակցել խմբակցության նոր ղեկավարով և քարտուղարով:
Խմբակցության ղեկավարի պաշտոնի համար կա ընդամենը մեկ հավակնորդ` կուսակցության նախագահ Նաիրա Զոհրաբյանը, ով մինչև այժմ զբաղեցնում է խմբակցության քարտուղարի պաշտոնը: Չնայած ԲՀԿ խմբակցությունում կան կուսակցությունից դուրս եկած պատգամավորներ, ովքեր մանդատը չկորցնելու համար շարունակում են մնալ խմբակցության կազմում, սակայն նրանք իրենց չեն համարում այդ խմբակցության գործուն անդամներ և ամենայն հավանականությամբ չեն մասնակցի խմբակցության նիստին, և Զոհրաբյանի ընտրությունը կանցնի առանց լուրջ խոչընդոտների:
Զոհրաբյանի խմբակցության նախագահ ընտրվելուց հետո, թափուր մնացած քարտուղարի պաշտոնի համար կա երկու թեկնածու՝ ԱԺ տնտեսական հարցերի հանձնաժողովի փոխնախագահ Միքայել Մելքումյանը և ԲՀԿ երիտասարդական կառույցի ղեկավար Վահե Էնֆիաջյանը: Նրանցից բացի քննարկվում էր նաև Լյովա Խաչատրյանի թեկնածությունը, սակայն Խաչատրյանն ինքը ցանկություն չի ունեցել առաջադրվել այդ պաշտոնում:
ԲՀԿ-ի ներսում խմբակցության քարտուղարի հարցում հնարավոր չի եղել միասնական տեսակետ ձևավորել, քանի որ և՛ Մելքումյանը, և՛ Էնֆիաջյանը ցանկանում են լինել խմբակցության քարտուղար: Թե նրանցից ով կընտրվի խմբակցության քարտուղարի պաշտոնում` կորոշվի քվեարկության արդյունքում: ԲՀԿ-ում արդեն տեղի են ունենում դիրքավորումներ և կուսակցության խոսնակ Վահան Բաբայանն արդեն հայտարարել է, որ իր համար նախընտրելի թեկնածուն Վահե Էնֆիաջյանն է:
Կարո՞ղ է խմբակցության քարտուղարի ընտրությունը ԲՀԿ ներսում նոր հակասությունների պատճառ դառնալ: Ամենայն հավանականությամբ ոչ, որովհետև խմբակցության քարտուղարի պաշտոնը որևէ լուրջ արտոնություններ չի նախատեսում, և այն ընդամենը ֆորմալ նշանակություն ունի: Գուցե այն ժամանակ, երբ խմբակցության նախագահը Գագիկ Ծառուկյանն էր, ով չէր մասնակցում խորհրդարանի նիստերին, խմբակցության քարտուղարի վրա էր դրված խմբակցության աշխատանքի կազմակերպումը:, Նաիրա Զոհրաբյանը, որպես խմբակցության քարտուղար ինքնադրսևորվելու բավական մեծ հնարավորություններ ուներ, սակայն խմբակցության ղեկավար Նաիրա Զոհրաբյանի պարագայում, դժվար թե խմբակցոության քարտուղարը խմբակցության ներխորհրդարանական գործունեության կազմակերպման հացում որոշիչ ազդեցություն ունենա: Ի դեպ, նմանատիպ իրավիճակ է նաև խորհրդարանական մյուս բոլոր խմբակցություններում, որտեղ խմբակցության քարտուղարը միշտ էլ ղեկավարի ստվերում է:
Դառնալով խմբակցության ղեկավար, Նաիրա Զոհրաբյանն իր վրա է վերցնում ԲՀԿ-ի գործունեության հետագա պատասխանատվությունը: Իսկ այդ գործունեությունը բավական մշուշոտ և և անորոշ է: Խնդիրն այն է, որ որևէ մեկը չգիտի, թե ինչ դիրքորոշմամբ պետք է հանդես գա ԲՀԿ-ն, իր ունեցած նախկին հանրային վստահությունը վերականգնելու համար: Թեև Նաիրա Զոհրաբյանի առաջին գործը խմբակցության ղեկավարի պաշտոնում կլինի այն, որ նա ԲՀԿ-ին կհայտարարի ընդդիմադիր, բայց մի բան է հայտարարելը, մի այլ բան դա իրագործելը: Հայաստանի խորհրդարանում կան առնվազն երկու խմբակցություններ, ովքեր հայտարարել են ընդդիմադիր լինելու մասին, սակայն իրենց վարքագծով շատ քիչ են տարբերվում իշխանություններից: Ամենայն հավանականությամբ ԲՀԿ-ն լրացնելու է հենց այդ տիպի ընդդիմադիրների ցանկը:
Լուսանկարը` PAN Photo-ի