Վերջին շրջանում իշխանական օլիգարխները, ինչպես նաև Ռոբերտ Քոչարյանը արշավ են սկսել տպագիր մամուլի դեմ և արդեն մի քանի դատական հայցեր են ներկայացվել «Ժամանակ», «Հայկական ժամանակ», «Երկիր», «Հրապարակ» օրաթերթերի դեմ:
Խոսքի ազատության պաշտպանության կոմիտեի նախագահ Աշոտ Մելիքյանի գնահատմամբ, քաղաքական գործիչները, մեկը մյուսին նայելով, որոշել են ճնշել ընդդիմադիր մամուլին և ստիպել, որպեսզի նրանք լռեն, կամ եթե նույնիսկ չլռեն, ապա տաս անգամ մտածեն, թե արժի արդյոք քննադատել և սուր հոդվածներ պատրաստել:
«Ժամանակ» օրաթերթի գլխավոր խմբագիր Արման Բաբաջանյանը կոչ է արել լրատվամիջոցներին, որ անհրաժեշտ է համախմբվել ու Զրպարտության և վիրավորանքի մասին օրենքում փոփոխություններ կատարելու պահանջ ներկայացնել և նույն կոչն արել է նորանշանակ օմբուդսմեն Կարեն Անդրեասյանին:
Մելիքյանի գնահատմամբ, օրենքը կարելի է փոխել, բայց գլխավոր խնդիրը դատական պրակտիկայի մեջ է, և այնտեղ պետք է մոտեցումը փոխել. «Վերին շեմը, որը նախատեսվում է օրենքով շատ բարձր է մեր լրատվամիջոցների համար, և դա պետք է իջեցնել, բայց իրականում ամենամեծ խնդիրը ոչ թե օրենսդրական է, այլ մեր դատական պրակտիկայի, մեր քաղաքական իրավիճակի մեջ է»:
Ըստ Մելիքյանի` եթե դատարանները հաշվի առնեին նաև լրատվամիջոցների ֆինանսական վիճակը, եթե օբյեկտիվորեն գնահատեին արդյոք պատվին և արժանապատվությանը վնաս է հասցվել, արդյոք խախտված է Եվրոպական կոնվենցիայի 10-րդ հոդվածը, ապա նման խնդիրներ չէին առաջանա:
«Իհարկե, կարելի է առաջարկել փոփոխություններ, կարելի է նաև օմբուդսմենի միջոցով, բայց միակ խնդիրը օրենքում, որ ես տեսնում եմ, դա վերին շեմի իջեցումն է»,- եզրակացրեց Մելիքյանը: