«Մենք սրընթաց մտնում ենք հավասարակշռության վիճակի մեջ: Որոշակի ստատուս-քվոյի իրավիճակ է, որում կա ապագա զարգացման խոստումը»,- այսօրվա Հայաստանի քաղաքական իրավիճակն այսպես է նկարագրում Ղարաբաղ կոմիտեի անդամ Աշոտ Մանուչարյանը: Մեզ հետ զրույցում նա կարծիք հայտնեց, որ եթե երկրի «ներսի պոտենցիալի նոր ուժը դուրս գա, ապա խաղը որոշվելու է երկրի օգտին: Եթե այդ ուժը չլինի, ապա, ինչպես կասեին մուսուլմանները՝ իշալլահ»: Ըստ նրա՝ Հայաստանի համար օտար ուժերը սկսել են պատերազմ: «Այսօր դրսի ուղղորդիչ ազդակներն էապես ավելի բարձր են, քան ներսինը: Դրսի ազդեցությունը հսկայական է. այն, ինչ տեղի ունեցավ վերջին ամիսներին, իրականում սառցաբեկորի երեւացող մասն էր, իսկ սառցաբեկորի ներքին մասում շատ ավելի մեծ բան կա: Հայաստանի ամբողջ իշխանական, օլիգարխիկ համակարգը թիրախ է դարձել այսօր: Իրենք կատարել են մի սխալ՝ ամբողջովին հենվել են շահի համակարգի վրա, մտել են տարբեր գործարքների մեջ, կորցրել են իրենց ներքին հենարանը: Եվ այդ իմաստով մոտենում է հատուցման պահը»,-մեկնաբանեց պարոն Մանուչարյանը` հավելելով,- «Ստորության այս տասնամյակի պատասխանատվությունը ոչ մի երկիր չի ուզում իր վրա վերցնել: Նույնիսկ ով հովանավորել է իշխանություններին, առաջինը ինքը նրա դեմ դուրս կգա, ինքը կհարվածի: Այսպիսի վիճակ է Հայաստանում»: